Atyraýda jyl basynan beri zorlyq-zombylyq deregimen 30 qylmystyq is tirkelgen

ATYRAÝ. KAZINFORM – Atyraý oblysynda jyl basynan beri turmystyq zorlyq-zombylyqqa qatysty 30 qylmystyq is tirkelip otyr. Onyń ishinde 12 qylmystyq is sotqa joldanǵan. 

Atyraý oblystyq polıtsııa departamenti anyqtaý basqarmasynyń anyqtaýshysy, polıtsııa podpolkovnıgi Darhan Buljanovtyń aıtýynsha, áıelder men balalardyń quqyqtary men qaýipsizdigin qamtamsyz etýge basymdyq berilip otyr.

– Óıtkeni Memleket basshysy byltyrǵy 15 sáýirde «Qazaqstan Respýblıkasynyń keıbir zańnamalyq aktilerine áıelderdiń quqyqtary men balalardyń qaýipsizdigin qamtamasyz etý máseleleri boıynsha ózgerister men tolyqtyrýlar engizý týraly» zańyna qol qoıdy. Osyǵan baılanysty densaýlyqqa qasaqana jeńil zııan keltirý, uryp-soǵý sııaqty quqyq buzýshylyqtar úshin qylmystyq jaýapkershilik kózdeledi. Máselen, Atyraý oblysynyń aýmaǵynda jyl basynan beri otbasyndaǵy turmystyq zorlyq-zombylyq deregimen 30 qylmystyq is tirkeldi. Onyń ishinde QR Qylmystyq Kodeksiniń 108-1-babymen 6, al 109-1-babymen 24 derek bar. Tergep-tekserýdiń nátıjesimen 12 qylmystyq is sotqa joldandy. QR Qylmystyq-protsestik kodeksiniń 128-baby boıynsha 5 kúdikti ustalyp, qamaýǵa alyndy, - dep habarlady Darhan Buljanov.

Onyń pikirinshe, ár adam zorlyq-zombylyq faktilerine nemquraıly qaramaǵany jón. Zorlyq-zombylyq qurbany nemese kýágeri bolǵandar bul týraly quqyq qorǵaý organdaryna habarlaýy qajet. 

Eske sala ketelik, buǵan deıin atyraýlyq áıel egiz balasyna kúıeýi zorlyq kórsetken dep kúdiktenetinin jazǵan edik.