Atyraýda jyl basynan beri jol apatynan 73 adam mert bolyp, 858-i jaraqat alǵan

ATYRAÝ. KAZINFORM – Atyraý oblysynda jyl basynan beri jol apatynan 73 adam kóz jumǵan. Al, 858 adam túrli dene jaraqatyn alǵan.

Atyraý oblystyq polıtsııa departamentiniń baspasóz qyzmetinen málim etkendeı, jyl basynan beri 600-den astam jol-kólik oqıǵasy tirkelgen.

«Atyraý oblysynda jol boıyndaǵy kólik apatynyń birneshe sebebi anyqtalyp otyr. Birinshiden, júrgizýshiler jyldamdyqty shamadan tys asyrady. Ekinshiden, joldyń qarsy baǵytyndaǵy jolaqqa shyǵady. Úshinshiden, manevr jasaý erejelerin qatań saqtamaıdy. Jyl basynan beri osyndaı sebepterdiń saldarynan 600-den astam jol-kólik oqıǵasy tirkeldi. Oqıǵalardyń saldarynan 73 adam kóz jumdy. Al, 858 adam túrli dene jaraqatyn aldy», -dep habarlady departamenttiń baspasóz qyzmeti.

Óńirlik departament jol-kólik oqıǵasynyń kóbeıýine baılanysty 11-17 qarasha aralyǵynda «Jol júrisi qaýipsizdigi aptalyǵy» aktsııasyn ótkizip jatyr.

«Bul aktsııany ótkizýdegi basty maqsat – júrgizýshilerge jolda júrý erejesin qatań saqtaýdy eskertý, jol-kólik oqıǵasynyń aldyn alý. Patrýldik polıtsııa qyzmetkerleri kólik júrgizýshilerdiń qatelikke urynbaǵanyn, ózderimen birge jolaýshylardyń dittegen jerge aman-esen jetkenin qalaıdy», - dep málim etti departamenttiń baspasóz qyzmetinen.

Eske sala ketelik, budan buryn Atyraý oblysynda eki kúnde jol qozǵalysy erejesi 2184 márte buzylǵanyn habarlaǵan edik.