Atyraýda jyl basynan beri zańsyz aınalymnan 11 kelige jýyq esirtki tárkilengen

ATYRAÝ. KAZINFORM – Atyraý oblysynda jyl basynan bergi 1 aıda esirtkimen baılanysty 15 quqyq buzýshylyq tirkelip otyr. Onyń ishinde 10 qylmys bar.

Atyraý oblystyq Polıtsııa departamenti bastyǵynyń orynbasary Quttybaı Sadyqovtyń málimetinshe, zańsyz aınalymnan 11 kelige jýyq esirtki zaty tárkilengen.

– Oblys aýmaǵynda júrgizilgen jedel-izdestirý sharalary kezinde esirtki ósiretin fıtozerthanasyn uıymdastyrǵan Atyraý qalasynyń turǵyny ustaldy. Odan 14 túp sora ósimdigi tárkilendi. Qazir kúdiktige qatysty qylmystyq is qozǵalyp, tergeý amaldary júrgizililip jatyr. Al zańsyz aınalymnan alynǵan esirtkiniń arasynda aýyr túrine jatatyn 1 keli 400 gramm sıntetıkalyq esirtki alyndy, -dep habarlady Quttybaı Sadyqov.

Onyń aıtýynsha, esirtki tasymaldaýshylardyń 1-eýi Aqtóbe qalasynan kelgen. Esirtki shegip, kólik aıdaǵan 2 adam ustalǵan.

– Atyraý qalasynda esirtki zattaryn taratyn saıttardy jarnamalaıtyn 10-nan astam graffıtı jazbalary joıyldy. Barlyq jarnama men kúdik týdyrǵan QR-kodtar udaıy tekserilip otyr. Internet jelisine júrgizilgen monıtorıngtiń nátıjesinde esirtki jarnamalaıtyn 50 saıt anyqtalyp, Іshki ister mınıstrligine buǵattaý úshin joldandy, - dep málim etti Quttybaı Sadyqov.

Eske sala ketelik, buǵan deıin Atyraý oblysynda 1 jylda 250 keliden astam esirtki tárkilengenin habarlaǵan edik.