Atyraýda jyl basynan beri turǵyn úılerde 90 órt tirkeldi
ATYRAÝ. KAZINFORM — Atyraý qalasynda jyl basynan beri turǵyn úılerde 90 órt tirkeldi. Bul ótken jyldyń sáıkes kezeńimen salystyrǵanda 13% kóp. Órt saldarynan 2 adam qaza taýyp, 3 adam kúıik jaraqatyn alǵan.
Jalpy qala aýmaǵynda jyl basynan beri 123 órt oqıǵasy tirkelgen. Sonymen qatar tabıǵı gazdan ýlanýdyń 7 jaǵdaıy anyqtalǵan. Ótken jyly bul kórsetkish 2 jaǵdaıdy quraǵan.
Jylytý maýsymy qarsańynda turǵyn úı sektoryndaǵy profılaktıkalyq jumystar kúsheıtiledi. Bıyl qalada áleýmettik osal topqa jatatyn 383 turǵyn úı anyqtalyp, olardyń barlyǵy 100% aralanǵan. Bul úılerde túsindirý jumystary júrgizilip, jergilikti atqarýshy organdar men eriktilerdiń qoldaýymen gaz jáne tútin dabylqaqqyshtary ornatylyp jatyr.
Atyraý qalasy Tótenshe jaǵdaılar basqarmasynyń bastyǵy Erbol Ǵabıtovtyń aıtýynsha, turǵyn úılerdegi órttiń negizgi sebepteriniń qatarynda peshterdiń aqaýly bolýy, murjalardyń ýaqytyly tazalanbaýy, elektr jelileriniń shamadan tys júktelýi, qoldan jasalǵan elektr jylytý quraldaryn paıdalaný jáne balalardy qaraýsyz qaldyrý bar.
— Sondyqtan turǵyndarǵa jylytý maýsymy bastalǵanǵa deıin úıdegi pesh, murja, elektr jelisi men jylytý qurylǵylarynyń jaramdylyǵyn tekserýdi usynamyz. Peshti qaraýsyz qaldyrmaý, onyń mańyna janǵysh zattardy qoımaý jáne ony tutandyrý úshin tez janatyn suıyqtyqtardy paıdalanbaý qajet, — dedi Erbol Ǵabıtov.
Elektr jylytý quraldaryn qoldanǵanda bir rozetkaǵa birneshe qýatty qurylǵyny qatar qospaý kerek. Sondaı-aq ata-analar balalardy qaraýsyz qaldyrmaı, sirińke men ottyqtardy olardyń qoly jetpeıtin jerde saqtaýy qajet.
Buǵan deıin Qaraǵandyda 7 gektar jer órtenip, qalaǵa tútin jaıylǵanyn habarladyq.
