Atyraýda jyl basynan beri turǵyn úıdegi órtten 12 adam kóz jumǵan

ATYRAÝ. KAZINFORM – Atyraý oblysynda jyl basynan beri turǵyn úı sektorynda 122 órt tirkelgen. Sonyń saldarynan 12 adam kóz jumdy.  

Atyraý oblystyq tótenshe jaǵdaılar departamenti memlekettik órt baqylaý basqarmasy bastyǵynyń orynbasary Dáýren Berdenovtiń málimetine súıensek, jyl basynan beri óńirde 260-tan astam órt bolǵan. Bul kórsetkish byltyrǵy kórsetkishten 13 paıyzǵa kóp. 

– Órttiń negizgi tutaný sebebi elektr jabdyqtaryn montajdaý, tehnıkalyq paıdalaný qaǵıdalaryn buzý, peshterdi ornatý men paıdalaný kezindegi qaýipsizdik talaptaryn saqtamaýdan týyndap otyr. Máselen, turǵyn úı sektorynda 122 órt tirkeldi. Turǵyn úılerdi sharpyǵan jalynnyń saldarynan 12 adam kóz jumdy, - dep habarlady Dáýren Berdenov. 

Onyń deregine qaraǵanda, 1 qazan men 3 jeltoqsan aralyǵynda turǵyn úı sektorynda 22 órt oqıǵasy tirkelgen. Eki aıda órtten 2 adam qaıtys bolyp, 1 adam jaraqat alǵan. 

– Jylytý maýsymy bastalǵannan beri tirkelgen órt ótken jyldyń sáıkes kezeńimen salystyrǵanda órt deregi 50 paıyzǵa ósti. Órttiń aldyn alý úshin tótenshe jaǵdaılar departamentiniń, jergilikti atqarýshy organ men polıtsııanyń, «QAZAQGAZ AIMAQ» AQ-nyń qyzmetkerleri jáne eriktilermen birge jeke sektordaǵy 17 221 úıdiń turǵyndaryna qaýipsizdiń erejesi túsindirildi. Bul úılerde 30 myńnan astam adam turady, - dedi Dáýren Berdenov.

Eske sala ketelik, budan buryn Atyraý oblysynda turǵyn úıdegi órtten anasy men uly kóz jumǵanyn habarlaǵan edik.