Atyraýda jyl basynan beri moped júrgizýshileriniń kinásinen 17 jol oqıǵasy bolǵan

ATYRAÝ. KAZINFORM – Atyraý oblysynda jyl basynan beri moped júrgizýshileriniń kinásinen 17 jol oqıǵasy tirkelip otyr.

Atyraý oblystyq jergilikti polıtsııa basqarmasynyń bastyǵy, polıtsııa polkovnıgi Erlan Bıǵambaevtyń málimetinshe, moped júrgizýshileri 371 ret jol erejesin buzǵan. 

«Moped júrgizýshileriniń jol erejesin buzý deregine taldaý jasaldy. Taldaý sáıkes, olardyń basym bóligi jyldamdyqty shamadan tys asyrady. Aldyndaǵy kólikti basyp ozýǵa umtylady. Tipti baǵdarshamnyń qyzyl túsine toqtamaı, ótip ketedi. Osyndaı sebeptermen moped júrgizýshileriniń kinásinen 17 jol-kólik oqıǵasy tirkeldi», - deıdi Erlan Bıǵambaev. 

Onyń deregine súıensek, 12 jasóspirimniń qujatsyz motokólikti júrgizgeni anyqtalǵan. Motokólik júrgizýshileri ushyraǵan jol apatynan 25 adam túrli dene jaraqatyn alyp, 1 adam qaza tapqan. 

«Máselen, Qyzylqoǵa aýdanynyń Muqyr aýylynda ruqsat qujatynsyz motokólikti júrgizgen 19 jastaǵy stýdent 4 jasar balany qaǵyp qulatqan. Basynan jaraqat alǵan balaqaı aýrýhanaǵa jetkizildi. Ol áli kúnge deıin dárigerlerdiń baqylaýynda alynyp otyr. Al, 17 jasar bozbala mopedpen 16 jasar boıjetkendi qaǵyp, oqıǵa ornynan qashyp ketti. Patrýldik polıtsııa qyzmetkerleri atalǵan mopedtiń qaı baǵytta bar jatqanyn anyqtap, toqtatýǵa tyrysty. Alaıda, jasóspirim zańdy talaptardy oryndamady. Sol sebepten, patrýldik polıtseıler ony májbúrli túrde toqtatty», - dep habarlady Erlan Bıǵambaev. 

Eske sala ketelik, budan buryn Atyraý polıtseıleri moped júrgizýshisin ustaý kezinde qulatyp alǵanyn jazǵan edik.