Atyraýda jyl basynan beri kólik róline otyrǵan 732 mas júrgizýshi ustaldy

ATYRAÝ. KAZINFORM — Atyraý qalasynda alkogoldik ishimdik iship, kólik róline otyrǵan júrgizýshiler azaımaı tur. Jyl basynan beri osyndaı 732 júrgizýshi ustalǵan.

Atyraý qalalyq polıtsııa basqarmasy patrýldik polıtsııa batalonynyń qyzmetkeri, polıtsııa kapıtany Azamat Nájimedenovtiń aıtýynsha, quqyq buzýshylar «Mas júrgizýshi — qylmysker» is-sharasy kezinde anyqtalǵan. 

«Mas kúıde kólik júrgizý — jol qozǵalysy qaýipsizdigine tónetin eń úlken qaterdiń biri. Sol sebepten, osyndaı júrgizýshilerdi anyqtaý, jol apatynyń aldyn alý úshin reıdtik sharalar turaqty túrde ótkizilip keledi. Máselen, 17 qarashada túngi saǵat 02:55 shamasynda H.Dosmuhamedov kóshesinde kúdik týdyrǵan Hyundai Elantra avtokóligi toqtatyldy. Tekserý barysynda júrgizýshiniń mas kúıinde rýlge otyrǵany anyqtaldy. Al, 18 qarashada tańǵy saǵat 05:00 shamasynda Sátpaev kóshesinde Toyota Camry avtokóligin júrgizgen 1992 jylǵy er adam dál osyndaı zań buzýshylyq jasady», — dep habarlady Azamat Nájimedenov.

Onyń deregine qaraǵanda, ótken apta ishinde 12 mas júrgizýshi ustalǵan. Al, sońǵy bir aıda osyndaı 23 júrgizýshiniń rólge otyrǵany anyqtalǵan.

Eske sala ketelik, budan buryn Atyraýda jyl basynan beri jol apatynan 73 adam mert bolyp, 858-i jaraqat alǵanyn habarlaǵan edik. 

Atyraý oblystyq polıtsııa departamentiniń málimetinshe, kólik apatyna birneshe sebep áser etedi. Birinshiden, júrgizýshiler jyldamdyqty shamadan tys asyrady. Ekinshiden, joldyń qarsy baǵytyndaǵy jolaqqa shyǵady. Úshinshiden, manevr jasaý erejelerin qatań saqtamaıdy. Jyl basynan beri osyndaı sebepterdiń saldarynan 600-den astam jol-kólik oqıǵasy tirkeldi. Jol apatynyń saldarynan 73 adam kóz jumyp, 858 jolaýshy túrli dene jaraqatyn alǵan.