Atyraýda jyl basynan beri qylmys jasaǵan 31 jasóspirim anyqtalǵan

ATYRAÝ. KAZINFORM – Atyraý oblysynda jyl basynan beri 31 jasóspirimniń qylmys jasaǵany tirkelip otyr.

Atyraý oblystyq jergilikti polıtsııa basqarmasynyń basshysy Erlan Bıǵambaevtyń deregine qaraǵanda, ishki ister organdaryna 2815 jetkizilgen.

«Jyl basynan beri jasóspirimdermen jáne olarǵa qatysty jasalatyn qylmystardyń, quqyq buzýshylyqtardyń aldyn alý maqsatynda «Túngi qaladaǵy balalar», «Jasóspirim», «Jasóspirim jáne jaýapkershilik» is-sharalary ótkizildi. Atqarylǵan is-sharalarǵa qaramastan jyl basynan beri ishki ister organdaryna 2815, onyń ishinde 31 jasóspirim qylmys jasaǵany úshin jetkizildi. Atyraý oblystyq kámeletke tolmaǵandardy beıimdeý ortalyǵyna 48 jasóspirim ornalastyryldy. Polıtsııanyń arnaıy esebine 89 jasóspirim alyndy. Onyń ishinde profılaktıkalyq esepke qoıylǵan 45 jasósipirim bar. Balalardy tárbıeleý jónindegi mindetterin oryndamaǵany 41 ata-ana esepke qoıyldy», -dedi Erlan Bıǵambaev.

Onyń aıtýynsha, qańtardan beri balalardyń qatysýymen 50-den astam jol-kólik oqıǵasy tirkelgen. Jol-kólik oqıǵasynan 6 jasóspirim qaza tapqan. Al, 60-tan astam jasóspirim ár-túrli dene jaraqatyn alyp otyr.

Eske sala ketelik, buǵan deıin Atyraýda jyl basynan beri moped júrgizýshileriniń kinásinen 17 jol oqıǵasy bolǵanyn jazǵan edik.