Atyraýda jyl basynan beri ekologııany lastaǵandarǵa 916 mln teńge aıyppul salyndy
ATYRAÝ. KAZINFORM – Atyraý oblysynda jyl basynan beri Ekologııalyq Kodekstiń saqtalýyna qatysty 10 tekserý júrgizilgen.
Atyraý oblysy boıynsha ekologııa departamentiniń basshysy Asqar Júsipovtiń málimetinshe, qorshaǵan ortanyń tazalyǵyn búldirgen munaı kompanııalaryna aıyppul salynǵan.
– Bıyl sharýashylyq júrgizýshi sýbektilerge 16 baqylaý júrgizildi. Onyń ishinde 5 profılaktıkalyq baqylaý, jospardan tys 10 tekserý bar. Al 1 tekserý zańnama talaptaryna sáıkestigine qatysty bolyp otyr. Tekserýlerdiń nátıjesimen ekologııalyq zańnamany buzýdyń 38 deregi anyqtaldy. Zań buzýshylyqtardy joıý úshin 8 nusqama berildi. Tabıǵatty búldirgen kompanııalarǵa 916 mln 858 myń teńgeniń 86 ákimshilik aıyppuly salyndy, -dep habarlady Asqar Júsipov.
Onyń aıtýynsha, birneshe kompanııanyń qorshaǵan ortany lastaǵan áreketi jurtshylyq arasynda rezonans týdyrǵan.
– Qyzylqoǵa aýdanyndaǵy Taısoıǵan ken ornynda burǵylaý shlamdary tasymaldaý kezinde topyraqqa tógildi. Osyǵan baılanysty jospardan tys tekserý júrgizilip, tapsyrys berýshi «Embimunaıgaz» AQ-ǵa qatysty ákimshilik quqyq buzýshylyq týraly is qozǵaldy. Kompanııaǵa salynǵan aıyppul kólemi 393 myń 200 teńgeni qurady. Al, merdiger «Munaı Servıs LTD» JShS-ǵa 3 mln 932 myń teńge, sýbmerdiger «Eko-Tehnıks» JShS-ǵa 589 myń 800 teńge aıyppul salyndy, -dedi Asqar Júsipov.
Bıyl naýryz aıynda Jylyoı aýdanynda ornalasqan «Batys Prorva» ken ornyndaǵy №437 uńǵymadan gaz atqylaǵan edi. Bul ken ornyna «Embimunaıgaz» AQ-nyń «Jylyoımunaıgaz» basqarmasy ıelik etedi.
– Departament qyzmetkerleri atalǵan oqıǵaǵa baılanysty jospardan tys tekserý júrgizdi. Tekserý qorytyndysymen tıisti óndiristik ekologııalyq baqylaýdy júrgizbegeni úshin QR Ákimshilik quqyq buzýshylyq týraly kodeksiniń 328 jáne 325-babyna sáıkes ákimshilik ister qozǵaldy. Qazir bul ister qaralyp jatyr. Munaı kompanııasynan jer búldirý deregimen qysqartylǵan túrde 1 mln 966 myń teńge ákimshilik ákimshilik aıyppul óndirildi, -dedi departament basshysy.
Sondaı-aq, «Karabatan Utility Solutions» JShS men merdigeri «IDOS Services» jeke kásipkerliginiń qyzmeti jospardan tys tekserilgen. Sebep – vakýým avtokólikterimen belgisiz suıyqtyqty arnaıy belgilenbegen oryndarǵa tógip, jerdi búldirý. Tekserýdiń nátıjesimen «Karabatan Utility Solutions» JShS-ǵa 1 mln 081 myń teńgeniń qysqartylǵan ákimshilik aıyppuly salynǵan.
– «ANACO» JShS ekologııalyq ruqsatsyz shyǵaryndylardy shyǵarý deregimen salynǵan aıyppul kólemine kelispedi. Alaıda sot qaýlylarymen 897 mln 24 myń teńge kólemindegi kúshinde qaldy. Al «Qojan» AQ «Morskoe» ken ornynda ornalasqan №56 uńǵymadaǵy apattyq jaǵdaı týraly habar bermegen. Sol sebepten, bul kompanııaǵa 393 myń 200 teńge, apattyq shyǵaryndylardy ruqsatsyz shyǵarý deregimen 979 myń 778 teńge kóleminde aıyppul salyndy. Aıyppul tolyq kólemde óndirildi, -dep málim etti Asqar Júsipov.
Eske sala ketelik, buǵan deıin Atyraý oblysynda byltyr tabıǵatty búldirýshilerge 42 mlrd teńge aıyppul salynǵanyn jazǵan edik.