Atyraýda jyl basynan beri 9 bala terezeden qulap, 2-eýi kóz jumǵan
ATYRAÝ. KAZINFORM – Atyraý qalasynda jyl basynan beri 9 bala kópqabatty úıdiń terezesinen qulaǵany tirkelgen. Al 2 bala kóz jumǵany anyqtalǵan.
Atyraý qalasynyń ákimi Shákir Keıkınniń aıtýynsha, sońǵy eki jylda 1-6 jas aralyǵyndaǵy balalardyń terezeden qulaýy jıilegen. Balalardyń ómirine qaýip qópqabatty turǵyn úılerdiń ashyq qalǵan terezesinen tónip otyr.
«Adam ómiriniń jalǵasy – jas urpaq. Alaıda, balalardyń qaýipsizdigine mán bermeı otyrmyz. Máselen, byltyr Atyraý qalasynda turǵyn úılerdiń ashyq turǵan terezesinen 8 balanyń qulaǵany anyqtaldy. Sonyń saldarynan 3 bala mert boldy. Al, bıyl jyl basynan beri 9 balanyń terezeden qulaý deregi tirkeldi. Eki bala qaıtys boldy. Mundaı oqıǵaǵa 2-den 7 jasqa deıingi balalar jıi ushyraıdy. Buǵan basty sebep – osy jastaǵy balalardyń ashyq tereze aldynda qaraýsyz qalýy. Statıstıkalyq málimetterge súıensek sońǵy jeti jylda osyndaı oqıǵalardyń sany artqan. Balanyń ólimi – úlken qasiret. Osyndaı qaıǵyly jaǵdaıdyń aldyn alýǵa aldymen ár otbasynyń, ár ata-ananyń jaýap beredi. Biraq, bul tek otbasylardyń mindeti dep qaramaý qajet. Jazataıym oqıǵany boldyrmaýdyń jolyn talqylaýymyz kerek», - deıdi Shákir Keıkın.
Shahar ákiminiń pikirinshe, PIK tóraǵalary turǵyndarǵa tereze qorshaýlary men bekitkish (fıksator) úlgilerimen tanystyryp, qaýipsizdik týraly aqparat berýi qajet. Kópqabatty turǵyn úılerdiń kireberis esigine eskertý qaǵazy ilinýi tıis.
Eske sala ketelik, budan buryn Atyraýda kópqabatty úıdiń terezesinen qulaǵan 3 jasar sábıdiń jaǵdaıy aýyr ekenin habarlaǵan edik.
