Atyraýda jyl basynan beri 3444 donordyń qany jaramdy bolǵan

ATYRAÝ. KAZINFORM – Atyraýda jyl basynan beri 4497 adam qan tapsyrýǵa ótinish bergen. Onyń ishinde 3444 donordyń qany jaramdy bolǵan.

Atyraý oblystyq qan ortalyǵy dırektorynyń orynbasary Samat Joldybaevtyń aıtýynsha, barlyq donordan 3407 doza erıtrotsıt quramdas qan komponenti, 608 doza krıopretsıpıtat jáne 405 doza trombotsıt quramdas komponent daıyndalǵan. 

«Qazir donorlar úshin barlyq qolaıly jaǵdaı jasalyp otyr. Qan ortalyǵynyń zerthanalary joǵary tehnologııalyq quraldarmen jabdyqtaldy. Donordan alynǵan qandy ázirleý jáne qaıta óńdeý bólimsheleri qajetti medıtsınalyq quraldarmen tolyq qamtamasyz etildi. Qan komponentterin ázirleý, barlyq túrin daıyndaý men tekserýdiń kezeńderi kompıýterlik jáne avtomattandyrylǵan júıemen júrgiziledi. Ortalyq ınfektsııalyq, ımmýnologııalyq, vırýsologııalyq qaýipsizdiktiń maksımaldy ólshemderin qamtamasyz etýge múmkindik beretin zamanaýı standarttarǵa sáıkes jumys isteıdi», - dedi Samat Joldybaev. 

Onyń málimetine súıensek, byltyr 12 myńǵa jýyq adam qan ortalyǵyna kelip, donor bolýǵa nıet bildirgen. Tekserýden soń 8 myń 500 donor qan tapsyrǵan.

Eske sala ketelik, budan buryn Atyraýda jańa týǵan sábılerge Tasqynbek pen Tasqynbı esimi qoıylǵanyn habarlaǵan bolatynbyz.