Atyraýda jyl basynan beri 2800-den astam adam qoǵamdyq orynda mas júrgen
ATYRAÝ. KAZINFORM – Atyraýda 7 aıda 8 myń 794 lıtr alkogol ónimi lıtsenzııasyz satylǵan. Al 2800-den astam adam qoǵamdyq orynda mas júrgeni úshin ákimshilik jaýapqa tartylǵan.
Atyraý oblysy ákiminiń orynbasary Jasulan Bısembıevtiń tóraǵalyǵymen ótken komıssııa otyrysynda úsh másele qaraldy. Birinshisi – mas kúıde jasalatyn qylmys deńgeıin tómendetý, ekinshisi – qaıtalanatyn quqyq buzyshylyqtardyń aldyn alý, úshinshisi – sybaılas jemqorlyqty boldyrmaý.
Atyraý oblystyq polıtsııa departamenti jergilikti polıtsııa qyzmetiniń bastyǵy Erlan Bıǵambaevtyń málimetinshe, túngi mezgilde tirkeletin qylmystyń basym bóligi mas kúıde jasalady.
«Bıyl 106 qylmys tirkeldi. Qylmystyń deni túnde jasalady. Buǵan spırttik ishimdikterdi satý ýaqytyna qoıylatyn talaptyń saqtalmaýy sebep bolyp otyr. Júrgizýshi kýáliginen aıyrylsa da masań kúıde kólik rýline otyrǵan 19 adam qylmystyq jaýapkershilikke tartyldy. Jyl basynan beri qoǵamdyq oryndar men kóshelerde 2893 adam alkogoldi ishimdik ishkeni úshin ustaldy. Olar QR Ákimshilik quqyq buzýshylyq týraly kodeksiniń 440-babymen ákimshilik jaza qoldanyldy», - deıdi Erlan Bıǵambaev.
Onyń aıtýyna qaraǵanda, ishimdikke qumarlyqtyń kesirinen keıbir otbasylarda turmystyq kıkiljiń týyndaıdy. Sot qaýlysymen otbasynyń shyrqyn buzǵan 459 adamǵa erekshe talap qoıyldy. Al, 322-ǵa alkolgoldi ishimdik ishýge tyıym salynǵan.
Oblystyq memlekettik kirister departamenti basshysynyń orynbasary Beken Shanaevtyń deregine súıensek, sońǵy 7 aıda 8 myń 794 lıtr alkogol ónimi lıtsenzııasyz satylǵan. Qazir araq-sharapty zańsyz saýdalaýshylar anyqtalyp jatyr.
Oblys ákiminiń orynbasary Jasulan Bısembıevtyń pikirinshe, Atyraý qalasynyń «Vokzal mańy» shaǵyn aýdanyndaǵy meıramhanalarǵa qatań baqylaý júrgizilýi qajet. Óıtkeni, komıssııa músheleri atalǵan shaǵyn aýdanda mas adamdardyń tarapynan quqyq buzýshylyq pen tártipsizdiktiń jıi tirkeletinin alǵa tartyp otyr.
Al, sybaılas jemqorlyqtyń aldyn alý úshin ákimdikke qarasty salalarda «bultty býhgalterııa» júıesine kóshýi kerek. Bul qarjylyq operatsııany onlaın baqylaýǵa múmkindik beredi. Alaıda, mundaı formatqa tek oblystyq bilim basqarmasynyń býhgalterııasy ǵana kóshken.
Eske sala ketelik, budan buryn deıin Atyraýda 6 aıda zańsyz aınalymnan 8 keliden astam esirtki tárkilengenin habarlaǵan bolatynbyz.
