Atyraýda jyl basynan beri 251 moped aıypturaqqa qoıyldy
ATYRAÝ. KAZINFORM — Atyraýda jyl basynan beri 251 moped arnaıy aıypturaqqa qoıyldy. Polıtsııanyń málimetinshe, quqyq buzýshylyq jasaǵandar arasynda kámeletke tolmaǵandar da bar.
Atyraý oblysy polıtsııa departamentiniń málimetinshe, jyl basynan beri moped júrgizýshilerine qatysty 324 ákimshilik hattama toltyrylǵan. Sondaı-aq mopedterdiń qatysýymen 27 jol-kólik oqıǵasy tirkelip, saldarynan 39 adam jaraqat alǵan.
Polıtsııa ókilderiniń aıtýynsha, keı jaǵdaıda jasóspirimder kólikti oqıǵa ornynda qaldyryp, ózderi oqıǵa ornynan ketken. Sonymen qatar mopedin memlekettik tirkeýden ótkizip, ony kámeletke tolmaǵan balasyna basqarýǵa beretin ata-analar da kezdesedi.
Atyraý oblysy polıtsııa departamenti Ákimshilik polıtsııa basqarmasynyń aǵa ınspektory Salıma Berdiǵojıevanyń aıtýynsha, moped júrgizýshisiniń jasy 16-dan asýy jáne tıisti júrgizýshi kýáligi bolýy qajet.
— Moped júrgizýshisiniń jasy 16-dan asqan, A1, A, V, sanatyndaǵy júrgizýshi kýáligi bolýy tıis. Sonymen qatar moped memlekettik tirkeýden ótip, nómirmen jabdyqtalýy, tehnıkalyq baıqaýdan jáne mindetti medıtsınalyq saqtandyrýdan ótýi qajet. Júrgizýshi men jolaýshy qorǵanysh shlemin kııýge, al moped júrgizý kezinde jaryq shamdaryn qosýǵa mindetti, — dedi Sálıma Berdiǵojıeva.
Polıtsııa mundaı quqyq buzýshylyqtardyń aldyn alý maqsatynda bilim berý uıymdarynda jáne adam kóp jınalatyn oryndarda profılaktıkalyq jáne reıdtik sharalar ótkizip keledi.
Tártip saqshylarynyń málimetinshe, soǵan qaramastan kámeletke tolmaǵan balasyna moped basqarýǵa ruqsat beretin ata-analar áli de kezdesedi.
Buǵan deıin Aqmola oblysynda jasóspirimder biriniń ústine biri otyryp moped aıdaǵanyn jazǵan edik.
