Atyraýda jyl basynan beri 24 jasóspirim júkti bolǵan
ATYRAÝ. KAZINFORM — Jyl basynan beri Atyraý qalasynda 24 jasóspirim qyzdyń júkti bolǵany anyqtaldy. Sonymen qatar kámeletke tolmaǵan 11 qyzǵa qatysty zorlyq-zombylyq faktisi boıynsha qylmystyq is tirkelgen.
Atyraý qalalyq prokýratýrasynyń málimetinshe, byltyr qalada 31 jasóspirim qyz júktilik boıynsha esepke alynǵan. Sondaı-aq 18 kámeletke tolmaǵan qyzǵa qatysty jynystyq sıpattaǵy qylmys tirkelgen.
Mamandardyń aıtýynsha, erte júktilik jasóspirimniń densaýlyǵyna ǵana emes, onyń psıhologııalyq jaǵdaıyna jáne bolashaq ómirine de áser etedi.
Dárigerler jasóspirimder arasyndaǵy júktiliktiń medıtsınalyq turǵydan kúrdeli ekenin atap ótti. Aǵzasy tolyq qalyptasyp úlgermegen qyzdarda júktilik kezinde túrli asqyný qaýpi joǵary bolýy múmkin.
Akýsher-gınekolog Áıgerim Qaıratqyzynyń aıtýynsha, erte jastaǵy júktilik kezinde aǵzaǵa túsetin salmaq artady. Bul júrek-qan tamyrlary, júıke júıesine áser etip, psıhologııalyq qysym týyndatýy múmkin. Sonymen qatar merziminen buryn bosaný, qan ketý jáne basqa da asqynýlar qaýpi bar.
Prokýratýra málimetinshe, búginde «Ana men bala» úıinde bir jasóspirim sábıimen birge turyp jatyr.
Buǵan deıin Aqtaýda jalǵan júktilik anyqtamasyn usynǵan áıel 15 táýlikke qamalǵanyn jazǵan edik.
