Atyraýda jyl basynan beri 20 bala terezeden qulaǵan
ATYRAÝ. KAZINFORM — Atyraý oblysynda jyl basynan beri balalardyń terezeden qulaýyna baılanysty 20 oqıǵa tirkeldi. Oqıǵalardyń barlyǵy balalardyń ata-anasynyń qaraýynsyz qalýynan bolǵan.
Atyraý oblystyq Tótenshe jaǵdaılar departamenti bastyǵynyń orynbasary Jantóre Demeshovtyń aıtýynsha, oqıǵalardyń jartysynan kóbi Atyraý qalasynda tirkelgen. Sondaı-aq Jylyoı aýdanynda — 2, Maqat jáne Inder aýdandarynda bir-birden jaǵdaı bolǵan. Balalar birinshi qabattan altynshy qabatqa deıingi terezelerden qulap, túrli dene jaraqatyn alǵan.
Departament málimetine súıensek, oqıǵalardyń teń jartysy kúndizgi ýaqytta, ıaǵnı keshki saǵat 18:00–ge deıin — 10 jaǵdaı, al qalǵan 10 jaǵdaı keshki 18:00–den keıin tirkelgen.
— Apta kúnderi boıynsha qarastyrsaq, 14 jaǵdaı jumys kúnderi, ıaǵnı dúısenbi men juma aralyǵynda bolǵan. Al 6 jaǵdaı demalys kúnderi — senbi jáne jeksenbi kúnderi tirkelgen. Bul ata-analardyń kúndelikti turmystaǵy nemquraılylyǵy men baqylaýdyń jetkiliksizdigin kórsetedi, — dep málimdedi departamenttiń baspasóz qyzmeti.
Osyǵan baılanysty óńirde balalardyń qaýipsizdigin kúsheıtý sharalary qolǵa alynǵan. Áleýmettik osal toptaǵy otbasylar turatyn 556 páterdiń terezesine arnaıy qorǵanys bekitpeleri ornatyldy.
Budan bólek, jyl basynan beri 375 reıd uıymdastyrylyp, 10 myńnan astam turǵynǵa túsindirý jumystary júrgizilgen.
Mamandardyń aıtýynsha, terezeden qulaǵan balalardyń basym bóligi — úsh jasqa deıingi búldirshinder.
Qutqarýshylar ata-analardy masaǵa qarsy torlarǵa senbeýge shaqyrdy. Olar balanyń salmaǵyn kóterýge arnalmaǵan. Sondyqtan balany tereze mańynda qaraýsyz qaldyrmaı, tereze aldyna jıhaz qoımaý jáne arnaıy qorǵanys bekitpelerin ornatý qajet.
Buǵan deıin Oralda polıtsııa qyzmetkerleri kópqabatty úıdiń 7-qabatyndaǵy terezege shyǵyp ketken 4 jasar balany qutqaryp qalǵanyn jazǵan edik.
