Atyraýda jyl basynan beri 100 myńǵa jýyq quqyq buzýshylyq anyqtalǵan

ATYRAÝ. KAZINFORM — Atyraýda jyl basynan beri 100 myńǵa jýyq quqyq buzýshylyq tirkelgen. Biraq ótken jyldyń osy kezeńindegi kórsetkishten 10 paıyzǵa azaıǵan.

Atyraý qalalyq polıtsııa basqarmasy patrýldik polıtsııa batalony komandıriniń orynbasary Óser Jáńgirhannyń deregine qaraǵanda, quqyq buzýshylyqtyń 85 myń 600-den astamy jolda júrý qaǵıdalaryn buzýmen baılanysty bolǵan. 

— Jyl basynan beri mas kúıinde kólik júrgizgen 117 júrgizýshi ustaldy. Jolda júrý erejesiniń talabyn buzǵan 3 myń 300 jaıaý júrginshige aıyppul salyndy. «Qorǵaý-Sergek» aqparattyq júıesiniń kómegimen 8 myń 600 ákimshilik quqyq buzýshylyq deregi tirkeldi. «Kıber-sherıf» júıesimen QR Ákimshilik quqyq buzýshylyq týraly kodeksiniń 592- babynyń talabyna qaıshy áreketke baılanysty 3 myńnan astam derek anyqtaldy. Jaıaý júrginshilerge 430 júrgizýshi jol bermegen. Jaıaý júrginshiler 1 myń 900 ret quqyq buzýshylyq jasady, - deıdi Óser Jáńgirhan.

Onyń málimetinshe, 4 myńǵa jýyq júrgizýshiniń aıyppulyn tólemegeni anyqtalǵan. Sol sebepten 678 júrgizýshiniń kóligi arnaýly turaqqa qoıylǵan. 

— Polıtsııa qyzmetkerleri júrgizýshilerge aıyppuldy keshiktirmeı tóleýdiń mańyzyn túsindirdi. Osydan keıin ózge júrgizýshiler aıyppulyn tolyq ótedi, - dep málim etti Óser Jáńgirhan. 

Eske sala ketelik, buǵan deıin Atyraýda er adamdy soqqyǵa jyqqandarǵa qatysty qylmystyq is qozǵalǵanyn jazǵan bolatynbyz.