Atyraýda jerasty tuzdy sýy kóterilip, úsh iri saıabaqtyń qurylysy toqtady
ATYRAÝ.KAZINFORM – Atyraý qalasynyń Nursaıa yqshamaýdanynda salynýy tıis 4,8 mlrd teńgelik saıabaqtyń qurylysy jobaǵa engizilgen túzetýlerge baılanysty toqtap tur. Ózgeristerge jerasty tuzdy sýy deńgeıiniń birneshe ese kóterilýi sebep bolǵan.
Qala ákimdiginiń málimetinshe, saıabaq qurylysy 2026 jyldyń qańtar aıynda bastalǵan. Degenmen qurylys jumysy bastaldy dep aıtý qıyn. Aýmaqtyń tegistelgenin ǵana baıqaýǵa bolady. Alaıda keıin jobaǵa ózgerister engizý qajettiligi týyndaǵan. Buǵan Atyraý qalasy máslıhatynyń 2023 jylǵy 12 qyrkúıektegi №25 turaqty komıssııasynyń qaýlysy jáne qurylys aýmaǵyndaǵy jerasty tuzdy sýynyń kóterilýi áser etken. Osyǵan baılanysty jobalyq-smetalyq qujattama qaıta qaralyp, bıyl 10 sáýirde saraptamaǵa joldanǵan. Ákimdik ókilderiniń málimetinshe, qurylys-montajdaý jumysy saraptamanyń oń qorytyndysy alynǵannan keıin ǵana jalǵasady.
- Aýmaǵy 4,6 gektar bolatyn saıabaqta jaıaý júrginshiler joly, júgirý alańy, balalar oıyn alańdary, demalys aımaqtary salynady. Sonymen qatar 325 aǵash egip, 17,6 myń sharshy metrden astam aýmaq kógaldandyrylady. Joba aıasynda 551 shaǵyn sáýlettik nysan men bir sýburqaq ornatý josparlanǵan ,-dep málimdedi ákimdik.
Budan bólek Samal yqshamaýdanynda josparlanǵan jańa saıabaqtyń qurylysy da áli bastalǵan joq. Jobanyń jalpy quny 1,5 mlrd teńge. Qazirgi ýaqytta tek eskızdik joba kelisilip, bas jospardy naqtylaý jáne jobalyq-smetalyq qujattamasy istelip jatyr. Bul jobaǵa da Nursaıadaǵydaı jerasty sýynyń deńgeıiniń kóterilýine baılanysty túzetýler engizilip jatyr. Jospar boıynsha Samal saıabaǵynyń aýmaǵy 2 gektar. Onda 600 aǵash otyrǵyzylyp, 282 shaǵyn sáýlettik nysan ornatý kózdelgen.
Óńirde kópten aıtylyp kele jatqan, degenmen qurylysy bastalmaǵan jobanyń biri – Jaıyq jaǵasynda salynýy tıis dendrologııalyq saıabaq. Joba úshin Atyraý yqshamaýdanynan 6, Geolog yqshamaýdanynan 20 gektar jer bólingen. Sondaı-aq, ósimdikterdi jyl boıy ósirýge jáne sırek kezdesetin ósimdik túrlerin saqtaýǵa múmkindik beretin klımatoron keshenin salý josparlanyp otyr.
- Qazir joba memlekettik-jekeshelik áriptestik sheńberinde júzege asyrylyp jatyr. Konkýrstyń birinshi kezeńi aıaqtaldy. Qazirgi ýaqytta konkýrstyń ekinshi kezeńin ótkizý úshin qajetti qujattar daıyndalyp jatyr, - dep málimdedi oblystyq Tabıǵı resýrstar jáne tabıǵat paıdalanýdy retteý basqarmasy.
Joba iske assa Atyraý qalasynyń jasyl beldeýi keńeıip, turǵyndardyń demalysyna arnalǵan jańa qoǵamdyq keńistikter paıda bolady, qalanyń ekologııalyq jaǵdaıy jaqsaryp, óńirdiń týrıstik jáne ınvestıtsııalyq tartymdylyǵy artady. Al klımatoron jergilikti klımatqa beıimdelgen ósimdikterdi ósirýge jáne qaladaǵy kógaldandyrý jumystaryn turaqty júrgizýge múmkindik beredi.
Qalalyq ákimdiktiń resmı aqparatyna súıensek, qazir oblys ortalyǵynda 26 saıabaq pen alań bar. Olardyń jaǵdaıyna sheneýnikter qanaǵattanarlyq deńgeıde degen baǵa berip otyr.
Buǵan deıin Atyraýda jasyl jelekter esepke alynbaǵanyn, dendrologııalyq jospar jasalmaǵanyn jazǵan edik.
