Atyraýda jer telimin zańsyz ıelengenderge 4,2 mln teńge aıyppul salyndy

ATYRAÝ. KAZINFORM – Atyraý qalasynda 26 jeke jáne zańdy tulǵanyń jer telimin zańsyz ıelengeni anyqtalyp otyr. Sol úshin olarǵa aıyppul salyndy.

Jer resýrstaryn basqarý komıtetiniń Atyraý oblysy boıynsha departamenti 26 jeke jáne zańdy tulǵaǵa qatysty memleket ıelegindegi jerdi zańsyz ıelengeni úshin ákimshilik is qozǵady.

«Zańsyz ıelengen jer ýchaskeleriniń aýmaǵy 3,8 gektardy qurady. Osyǵan baılanysty 4,2 mln teńge kóleminde ákimshilik aıyppul salyndy. Máselen, bir jyl buryn «Sh» sharýa qojalyǵyna 60 gektar jer ýchaskesin maqsatty paıdalanýǵa sáıkes ıgerý qajettigi týraly tapsyrma berilgen bolatyn. Sol tapsyrma oryndalmaǵandyqtan, departamenttiń sotqa jer ýchaskesin mindetti túrde tartyp alý týraly talap-aryzy berildi. Bul QR Jer kodeksiniń 94-babyna sáıkes qanaǵattandyryldy», - dep habarlady komıtetten.

Eske sala ketelik, buǵan deıin Atyraýdyń Maqat aýdanynda 130 gektar jer telimi memleket menshigine qaıtarylǵanyn jazǵan bolatynbyz.

Keıin Atyraý oblysynda 22 myń gektar jer ýchaskesi memleket menshigine qaıtarylǵanyn habarlaǵan edik.