Atyraýda jer beretin komıssııanyń múshesi óz atyna jer ýchaskesin rásimdep alǵan
ATYRAÝ. KAZINFORM - Maqat aýdanynyń jer qatynastary, sáýlet jáne qala qurylysy bóliminde júrgizilgen tekseris kezinde birqatar zańbuzýshylyq anyqtalǵan. Atap aıtqanda memlekettik qyzmet kórsetý, mindetti konkýrstyq rásimderdi elemeý jáne aýdan ákimdiginiń laýazymdy tulǵalarynyń quzyretine kirmeıtin sheshim qabyldaý kezinde eleýli kemshilikter bolǵan.
Maqat aýdany prokýrorynyń aktisi boıynsha saýda-sattyqtan tys tabystalǵan jalpy quny 144 mln teńge bolatyn 61 ga 3 jer ýchaskesi qaıtaryldy.
Sondaı-aq, saýda-sattyqtan tys jer ýchaskesin zańsyz alǵan tulǵalar qatarynda jer komıssııasynyń músheleri de bar bolyp shyqty.
Múddeler qaqtyǵysyna qaramastan sońǵysy komıssııa otyrysyna ózi qatysyp, bul jaǵdaıdy odan da qolaısyz etedi.
Sonymen qatar, aýdan ákimi orynbasary bıýdjetke tıisti tólemsiz kásipkerge jer ýchaskesin tegin bergen.
Prokýrorlyq qadaǵalaý aktisi nátıjesimen aýdan ákiminiń eki orynbasary tártiptik jaýapkershilikke tartylsa, jer qatynastary, sáýlet jáne qala qurylysy bóliminiń basshysy ÁQBtK 137-babynyń 1-bóligi boıynsha ákimshilik jaýaptylyqqa tartyldy.
