Atyraýda jekemenshik mektepterdi qarjylandyrý máselesi kóterildi
ATYRAÝ. KAZINFORM — Atyraýda jekemenshik mektepter oblystyq bilim berý basqarmasymen kelisimge kele almaǵan. Naqtyraq aıtqanda, jeke bilim ordalary basqarmadan memlekettik tapsyrysqa qol jetkize almady.
Kópti alańdatqan bul másele kásipkerler palatasynyń alańynda talqylandy. Kásipkerler basqarmadan aldyn ala esh habarlama almaǵandaryn aıtady. Ótinishterin qarastyrý kezinde basqarma ókilderi «júıede aqaý shyqty» dep, keri qaıtaryp alýdy suraǵan.
— Biz jan basyna shaqqan qarjylandyrý alý úshin aldyn ala ótinish joldaımyz. Sol kezde bilim basqarmasy basshysynyń orynbasary Sveta hanym keshki saǵat 22:00 shamasynda habarlasyp, portalda aqaý bar ekenin aıtyp, ótinishdi keri qaıtarýdy surady. «Erteń qaıta ashyp beremiz» degen soń, basqarma ókiliniń sózine senip, biz esh kúmánsiz oryndadyq. Alaıda kelesi kúni ol habarlamalaryn óshirip, baılanysqa shyqpady. Keıin ózimiz baryp suraǵanda, «qarajat bere almaımyz» degen jaýap aldyq. Bul jaǵdaı biz úshin túsiniksiz ári ádiletsiz. Áriptesterimizdiń aıtýynsha, Almatyda da osyndaı másele bolǵan, biraq olar qarjysyn alyp úlgergen, — dedi jekemenshik mektep ókili Akbar Novarov.
Mektep basshylary bilim men tárbıe sapasyna asa mán beriletinin aıtyp, jumystyń memlekettik bilim ordalarymen birdeı júrip jatqanyn jetkizdi. Jańa jyldan bastap eki tarap arasynda kelisimshart jasalmaǵandyqtan mektep qyzmetkerlerine aılyq tóleý máselesi týyndaǵan.
Akbar Novarovtyń aıtýynsha, birneshe jyl buryn óńirde apatty jáne úsh aýysymdy mektep máselesi órship turǵanda ákimdik kásipkerlerdi bilim berý salasynda jumys isteýge shaqyrǵan. «Endi bul naryqqa úlken oıynshylar kirgende shaǵyn mektepter kerek bolmaı qaldy» degen pikir bar.
Atyraý oblysynyń bilim berý basqarmasy habarlaǵandaı, 2025–2026 oqý jylynda jekemenshik bilim berý uıymdarynda orta bilim berýge memlekettik tapsyrysty ornalastyrýdyń jańa tetigi pılottyq joba retinde engizildi. Bul joba Qazaqstan Respýblıkasy Oqý-aǵartý mınıstrligi men óńir ákimdikteriniń birlesken buıryǵy, sondaı-aq QR Bilim jáne ǵylym mınıstriniń 2017 jylǵy 27 qarashadaǵy № 597 buıryǵyna sáıkes júzege asyrylyp otyr.
— Jekemenshik mektepterdi qarjylandyrýdyń negizgi maqsaty — úsh aýysymdy mektep máselesin sheshý jáne apatty mektepterdiń ornyna balama sheshim usyný. Qazirgi tańda biz qarjylandyryp otyrǵan 20 mekteptiń úsheýi — «Bınom». Olar bul baǵytta aıtarlyqtaı kómek kórsetip otyr. Sebebi, bul mektepterde 12 myń bala oqıdy. Jalpy keıbir jekemenshik mektepterdiń atalǵan máselelerdi sheshýge qosqan úlesi jetkiliksiz. Qazirgi ýaqytta bul baǵytta kelissózder júrgizilip jatyr. Osy oqý jylyn aıaqtaýǵa qoldaý kórsetýge tyrysamyz. Alaıda kelesi jyldan bastap jekemenshik mektepterdi qarjylandyrmaımyz, — dep pikir bildirgen edi kezdesýde oblystyq bilim berý basqarmasy basshysynyń orynbasary Sveta Amanshıeva.
Basqarma ókiliniń sózinshe, óńirdegi jekemenshiktegi bilim ordalarynyń basym kópshiligi bastaýysh bilim beredi jáne ulttyq biryńǵaı testileýge daıyndaıdy.
Búgin Atyraý oblysy bilim berý basqarmasynyń basshysy Marat Abýovtyń tóraǵalyǵymen 22 jekemenshik mekteptiń basshysynyń qatysýymen jıyn ótti.
Kún tártibinde eki másele qaraldy: jekemenshik mektepterde bilim sapasyn arttyrý jáne jyl sońyna deıingi qarjylandyrý.
— Jıyn barysynda jekemenshik bilim berý uıymdaryndaǵy oqý sapasyn kóterý baǵytyndaǵy jumystar talqylanyp, naqty mindetter aıqyndaldy. Sonymen qatar, mektepterdiń oqý jylynyń sońyna deıin tolyq kólemde qarjylandyrylatyny atap ótildi, -dep málimdedi bilim berý basqarmasynyń baspasóz qyzmeti.
Jalpy qarjylandyrý «e-Qazyna» tsıfrlyq platformasy arqyly júrgiziledi. A1 komponenti boıynsha (bilim berý protsesin qarjylandyrýǵa arnalǵan negizgi baǵyt) qarajat jekemenshik mektepterge memlekettik bilim berý tapsyrysyn ornalastyrýǵa baǵyttalǵan.
Buǵan deıin Oqý-aǵartý mınıstrligi jekemenshik mektepterdiń jaǵdaıyna qatysty túsinik berdi.
