Atyraýda jekemenshik balabaqshalar tarıf aıyrmasynyń tólenýin talap etti
ATYRAÝ. KAZINFORM – Atyraýdaǵy jekemenshik balabaqsha ıeleri memleketten bólinetin qarjynyń keshigýine baılanysty qıyndyqqa tap bolǵanyn aıtyp, oblystyq kásipkerler palatasynan kómek surady. Kásipkerlerdiń aıtýynsha, qańtar men aqpan aılaryndaǵy tarıf aıyrmasy áli kúnge deıin tólenbegen. Al aı saıynǵy qarjy da keshigip túsip jatyr.
Kásipkerlerdiń aıtýynsha, 2026 jyldyń basynan bastap mektepke deıingi uıymdardaǵy bir balaǵa arnalǵan memlekettik tapsyrys kólemi 55 659 teńgeden 57 608 teńgege deıin ósken. Alaıda qańtar men aqpan aılarynda tólem burynǵy normatıv boıynsha júrgizilgen. Al jańa jáne eski tarıf arasyndaǵy aıyrma áli kúnge deıin ótelmegen.
Sonymen qatar olardyń sózinshe, aı saıynǵy qarjylandyrý da belgilengen merzimnen kesh túsip jatyr. Bul másele qarjylandyrý tetigi oblystyq Bilim basqarmasynan Astanadaǵy Qarjy ortalyǵyna berilgennen keıin týyndaǵan.
– Biz mamyr aıynyń qarjysyn maýsymnyń 23-inde ǵana aldyq. Negizi bul qarajat maýsym aıynyń basynda túsýi kerek edi. Qyzmetkerlerdiń jalaqysyn ár aıdyń 10-yna deıin tóleýge mindettimiz. Amalsyz keshiktirýge týra keldi. Tipti keıbir balabaqshalar sáýir aıynyń aqshasyn áli almaǵanyn aıtyp otyr. Al qańtar men aqpan aılaryndaǵy tarıf aıyrmasy da tólengen joq. Eń ókinishtisi – elimizdiń qalǵan óńirlerinde bul másele joq, al bizde sheshilmeı keledi, – dedi kásipker Gúlhan Ótegenova.
Atyraý oblystyq Bilim berý basqarmasynyń basshysy Marat Ábýov bul máseleniń bıýdjet qarajatyn naqtylaý sessııasynyń keshigýine baılanysty týyndaǵanyn aıtty.
– Qańtar jáne aqpan aılaryndaǵy tarıf aıyrmasy mindetti túrde tólenedi. Qazirgi tańda bıýdjetten qosymsha 700 mıllıon teńgeden astam qarajat surap otyrmyz. Bul qarjy atalǵan aıyrmany óteýge baǵyttalady. Sonymen qatar vaýcherlik júıede memlekettik balabaqshalarda da tarıftiń ósýine baılanysty qarjy tapshylyǵy bar. Sondyqtan jergilikti bıýdjetten qosymsha qarjy qarastyrylyp jatyr. Sol sebepti alańdaýǵa negiz joq, – dedi basqarma basshysy.
Jıynda kásipkerler 2027 jyldan bastap engiziletin balabaqshalardy lıtsenzııalaý máselesin de kóterdi. Olardyń aıtýynsha, jańa talapqa sáıkes, jalǵa alynǵan kottedjlerde ornalasqan balabaqshalar ǵımarattyń nysanaly maqsatyn turǵyn úı sanatynan kommertsııalyq maqsatqa ózgertýi tıis. Bul kásipkerler úshin qosymsha qarjy men ýaqytty talap etedi.
Aıta keteıik, Atyraý oblysynda 140-qa jýyq jekemenshik balabaqsha jumys isteıdi. Onda 10 myńnan astam bala tárbıelenip jatyr.
Buǵan deıin balabaqsha vaýcherin ýaqytynda rastamaǵandar kezekten aıyrylýy múmkin ekenin jazǵan edik.
