Atyraýda jekemenshik balabaqsha tárbıeshisiniń búldirshinge kúsh qoldanǵany vıdeoǵa túsip qaldy
ATYRAÝ. KAZINFORM – Atyraýda jekemenshik balabaqsha tárbıeshisiniń búldirshinge kúsh qoldanǵany beınebaqylaý kamerasyna túsip qalǵan. Oqıǵaǵa baılanysty polıtsııa qylmystyq is qozǵady.
Balanyń ata-anasynyń aıtýynsha, búldirshin jekemenshik balabaqshaǵa nebári bes kún barǵan. Alǵashynda onyń mazasyzdanýyn beıimdelý kezeńimen baılanystyrǵan. Alaıda keıin balasynyń qulaǵynan qan aǵyp, ıyǵynda tistelgen iz baryn baıqap, balabaqshadaǵy beınebaqylaý kameralarynyń jazbasyn qaraǵan. Beınejazbada tárbıeshiniń balany qolynan súırep, julqylap, kúshtep uıyqtatýǵa árekettengeni kórinedi. Kishkentaıdyń anasy mundaı áreketter birneshe kún boıy qaıtalanǵanyn aıtady.
– Dúısenbi, sársenbi, beısenbi, juma kúnderi tórt kún boıy balamdy qorlaǵan. Kórgenimdi aıtyp jetkize almaımyn. Bala uıyqtamasa, qolyn jaýyp tastaıdy. Kórpeni alyp, ústinen basyp turady. Shaıqaǵan kezde laqtyryp jiberedi. Bala eki betimen qulaıdy. Qaıtadan tárbıeshiniń etegine jarmasady. Tamaq ishkisi kelse, ony da bermeıdi, – dedi balanyń anasy Jazıra Ǵabıden.
Balanyń jaqyndarynyń aıtýynsha, tárbıeshi buǵan deıin de isti bolǵan. Degenmen budan balabaqsha basshylyǵy habarsyz. Oqıǵa bolǵan jekemenshik mektepke deıingi bilim berý uıymy úsh aı buryn ashylǵan. Qazir munda 24 bala tárbıelenedi.
Balabaqsha quryltaıshysy Naǵıma Amanqosova bul jaǵdaıdyń alǵash ret tirkelgenin aıtyp, ata-anadan keshirim surady.
– Biz muny bilgen joqpyz. Bul jaǵdaıdy ata-anasymen birge bildik. Tárbıeshiniń úıine baryp sóılestik, biraq ol naqty jaýap bere almady. Balany tolyq medıtsınalyq tekserýden ótkizýge kómektesýge daıyn ekenimizdi ata-anasyna habarladyq, – dedi balabaqsha quryltaıshysy.
Atyraý oblystyq polıtsııa departamentiniń málimetinshe, atalǵan derek boıynsha «Kámeletke tolmaǵan adamdy tárbıeleý jónindegi mindetterdi oryndamaý» baby boıynsha qylmystyq is qozǵalǵan.
– Atalǵan oqıǵa boıynsha keshendi tergeý amaldary júrgizilýde. Quqyq buzýshylyqqa qatysy bar barlyq tulǵalar polıtsııa bólimine jetkizildi. Ózge aqparat tergeý múddesine sáıkes jarııalaýǵa jatpaıdy, – dep habarlady oblystyq polıtsııa departamentiniń resmı ókili Meıirim Erdáýlet.
Balanyń ata-anasy kinálilerdiń zań aldynda jaýap berýin talap etip otyr. Olardyń aıtýynsha, mundaı jaǵdaıdyń ózge balalarǵa qaıtalanbaýy úshin oqıǵaǵa jan-jaqty quqyqtyq baǵa berilýi qajet.
Eske salaıyq, buǵan deıin Atyraýda kásipker balabaqshaǵa kúrishtiń bir kelisin 21 myń teńgege satqanyn jazǵan edik.
