Atyraýda jeke mekteptiń quryltaıshysy alaıaqtyq jasaǵany úshin 6 jylǵa sottaldy
ATYRAÝ. KAZINFORM – Atyraýda bilim berý uıymy retinde tirkelgen «Lets School» mektebine qatysty alaıaqtyq deregi boıynsha qylmystyq is aıaqtalyp, sot aıyptaý úkimin shyǵardy. Bul týraly Atyraý oblysynyń prokýratýrasy habarlady.
Atyraý qalasynyń №2 sotynyń úkimimen atalǵan mekteptiń quryltaıshysy Qazaqstan Respýblıkasy Qylmystyq kodeksiniń 190-baby 4-bóliginiń 2) tarmaǵy boıynsha kináli dep tanyldy. Sot oǵan 6 jyl merzimge bas bostandyǵynan aıyrý jazasyn taǵaıyndady. Sonymen qatar 6 jyl boıy qarjylyq jáne kommertsııalyq uıymdarda basshylyq laýazymdardy atqarý quqyǵynan aıyryldy.
– Zańǵa qaıshy áreketterdiń saldarynan jábirlenýshilerge 120 mıllıon teńge kóleminde asa iri materıaldyq zalal keltirilip, atalǵan soma tolyq kólemde óndirip alý sottyń aıyptaý úkimimen mindetteldi. Shyǵarylǵan úkim qoǵamda alaıaqtyq pen azamattardyń senimin teris paıdalanǵany úshin jazanyń bultartpastyǵy qaǵıdatyn qalyptastyrýǵa baǵyttalǵan, - dep málimdedi oblys prokýratýrasy.
Aıta keteıik, jekemenshik mektep 2024 jyldyń 1 qyrkúıek kúni saltanatty túrde ashylǵan. Alaıda 2025 jyldyń aqpan aıynda jumysyn toqtatqan. Alǵashqy aılarda sabaqtar belgilengen kestege sáıkes ótkizilgen. Biraq qys mezgiline qaraı muǵalimderdiń jalaqysy keshiktirile bastaǵan. Sonyń saldarynan ustazdar jumysqa shyqpaı, sabaqtar jıi toqtap qalǵan. Ata-analar osydan keıin ǵana mekteptiń lıtsenzııasy joq ekenin bilip, aldanǵanyn túsingen. Amaly taýsylǵan ata-analar balalaryn oqý jylynyń ortasynda shuǵyl túrde basqa mektepterge aýystyrýǵa májbúr boldy.Kóp otbasy oqý aqysyn 12 aıǵa birden tólegen. Bir bala úshin tólengen ortasha soma shamamen 1 mıllıon teńgeni quraǵan. Al keıbir jaǵdaılarda bir otbasynyń tólegen qarajaty birneshe mıllıon teńgege deıin jetken.
Prokýratýra azamattarǵa kelisimshart jasasý nemese qarajat tóleý aldynda bilim berý uıymdarynyń quqyqtyq mártebesin, lıtsenzııasy men basqa da ruqsat qujattarynyń bar-joǵyn muqııat tekserý qajettigin eskertti.
Buǵan deıin Atyraýda 19 jastaǵy qyzdy qorlap, áleýmettik jelige vıdeo jarııalaǵan jigit 30 kúnge qamalǵanyn jazǵan edik.
