Atyraýda Jaıyqqa batqan 14 jasar jasóspirim tabylmaı jatyr

ATYRAÝ. KAZINFORM – Atyraýda Jaıyq ózenine batyp ketken 14 jasar jasóspirim tabylmaı jatyr. 

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, bul týraly búgin 22 tamyzda túngi saǵat 01:40–ta habar berilgen.

«Atyraý qalasyna taıaý ornalasqan Aqjar aýylynyń tusynda 1 jasóspirimniń sýǵa batyp ketkeni týraly shaqyrtý tústi. Qutqarýshylar oqıǵa ornyna jedel jetip, 2010 jylǵy uldyń jabdyqtalmaǵan orynda sýǵa túskenin anyqtady. Súńgýirleri tańǵa deıin sý astynda izdestirý jumysyn júrgizdi», - dep habarlady departamenttiń qoǵammen baılanys tobynan. 

Sýǵa batqan jasóspirimdi izdeý tańǵy saǵat 6:30-da qaıta jalǵasqan. Oǵan Atyraý oblystyq tótenshe jaǵdaılar departamentinen 16 qutqarýshy, 4 tehnıka, 4 júzý quraly tartylǵan.

Eske sala ketelik, budan buryn Atyraý oblysynda 3 aıda sýǵa batqan 25 adamnyń 14-i jasóspirim ekenin jazǵan edik.