Atyraýda Jaıyq ústindegi jetinshi kópir: 2023 jylǵy joba áli aıaqtalǵan joq
ATYRAÝ. KAZINFORM — Atyraýda Jaıyq ózeni arqyly ótetin jetinshi kópirdiń qurylysy bastaldy. Ol Soltústik aınalma jolynyń jobasynda qarastyrylǵan. Infraqurylymdyq joba 2023 jyly bastalǵanymen, nysandy paıdalanýǵa berý merzimi birneshe ret keıinge shegerilgen.
Jańa kópir Atyraý qalasyndaǵy Almaly men Talǵaıran eldimekenderin baılanystyratyn ýchaskede salynyp jatyr. Qazir nysanda burǵylaý jáne qadalardy betondaý jumysy júrgizilýde.
«QazAvtoJol» UK Atyraý oblystyq fılıalynyń Sapany baqylaý jáne jumystardy qabyldaý bóliminiń basshysy Danııar Myrzashevtiń aıtýynsha, joba boıynsha 208 qada ornatý josparlanǵan. Qazirgi ýaqytta onyń 40-y betondanǵan. Qurylys jumysyna 76 adam men 17 arnaıy tehnıka jumyldyrylǵan.
— Qurylys tamyzda bastaldy. Qoldanystaǵy kestege sáıkes, jumystardy 2027 jylǵy jeltoqsanda aıaqtaý josparlanyp otyr, — dedi Danııar Myrzashev.
Jalpy uzyndyǵy 27,5 shaqyrym bolatyn Soltústik aınalma joly tranzıttik kólikti qala syrtyna baǵyttaýǵa arnalǵan. Joba boıynsha Jaıyq ózeni arqyly ótetin kópirden bólek, Qaraózek arqyly kópir, sondaı-aq birneshe jol aıryǵy qarastyrylǵan.
Qazir Atyraý–Dossor baǵytyndaǵy jol aıryǵynyń qurylysy júrgizilip jatyr. Sonymen qatar Atyraý–Astrahan, Atyraý–Inder jáne Atyraý–Oral baǵyttarymen túıisetin ýchaskelerde jol aıryqtary men retteletin qıylystar salý josparlanǵan.
Joldyń bastapqy josparynda qurylysty 2024 jyly aıaqtaý kózdelgen. Keıin kópirlerdiń jobasyna ózgerister engizilýine baılanysty merzim 2026 jylǵa aýystyrylǵan.
2026 jyldyń basynda«QazAvtoJol» UK» AQ Atyraý oblystyq fılıalynyń dırektory Ardaq Qaıredenov aınalma joldyń eki ýchaskesin tolyq aıaqtap, paıdalanýǵa berý josparlanyp otyrǵanyn aıtqan edi.
