Atyraýda Jaıyq ústindegi kópirdiń oıyǵy tún ishinde jóndeldi

ATYRAÝ. KAZINFORM – Atyraýda Jaıyq ózeniniń ústinen salynǵan kópir oıylyp qalǵan edi. Jergilikti ákimdiktiń uıymdastyrýymen kópirdegi oıyq tún ishinde jóndeldi. 

Atyraý qalasynda kólik qatynasyn retteý úshin Jaıyq ózeniniń ústinen salynǵan 6 kópir bar. Keshe munaıly shahardyń «Atyraý» jáne «Vokzal mańy» shaǵyn aýdandaryn jalǵaıtyn kópirdiń ústinde oıyq paıda boldy. 

Bul jóninde áleýmettik jelide vıdeo tarap, jurtshylyqty alańdatqan edi. Osyǵan baılanysty Atyraý qalalyq ákimdiginiń baspasóz qyzmeti kópirdiń jóndelgeniin habarlap, vıdeo usyndy.

«Keshe Atyraý qalalyq jolaýshylar kóligi jáne avtomobıl joldary bóliminiń mamandary oqıǵa ornyna baryp, qajetti zerdeleý jumystaryn júrgizdi. Zerdeleý nátıjesimen oıyqty kólik qozǵalysyn shektemeı, júrgizý týraly sheshim qabyldandy. Kópirdegi oıyq kólik aǵyny azaıǵan mezgilde – túni ishinde tolyq jóndeldi. Qazir kópir ústinde kólik qatynasyna eshqandaı qaýip joq. Kólikter kópir ústimen kedergisiz júrip jatyr», - dep habarlady qalalyq ákimdiktiń baspasóz qyzmeti.

Bul kópir 1985 jyly iske qosylǵan. Kópirdiń uzyndyǵy – 305 metr, al, eni ótkelimen birge 14 metrdi quraıdy. 

Eske sala ketelik, buǵan deıin Jaıyq ózeniniń ústindegi kópir oıylyp qalǵanyn habarlaǵan edik.