Atyraýda Jaıyq ózeniniń jaǵalaýynda qutqarý stansasy ashyldy
ATYRAÝ. KAZINFORM – Atyraýda Jaıyq ózeniniń jaǵalaýynda qutqarý stansasy ashyldy. Jańa nysan 2,5 aıda salynǵan.
Tótenshe jaǵdaılar mınıstri Shyńǵys Árinovtiń aıtýynsha, biregeı qutqarý stansasynyń TMD elderi aýmaǵynda balamasy joq. Nysan qurylysyna joǵary sapaly tez qurastyrylatyn modýldik materıaldar paıdalanylǵan.
– Bul qutqarý stansasynyń ashylýy – Atyraý oblysy turǵyndarynyń qaýipsizdigin qamtamasyz etý maqsatyndaǵy mańyzdy qadam. Biz bólimshelerimizdiń ınfraqurylymy men jabdyqtalýyn jaqsartyp, turǵyndardy qorǵaý úshin ınnovatsııalyq jáne tıimdi sheshimderdi engizýdi jalǵastyramyz. Endi bul nysan óńir úshin naǵyz tirek bolady. Ony salý jáne zamanaýı jabdyqtarmen jabdyqtaý jyldamdyǵy bizdiń qutqarýshylarymyzdyń joǵary kásibıligin kórsetti, -dedi Shyńǵys Árinov.
Qutqarý stansasynda jumys kabınetteri, dıspetcherlik jáne qutqarýshylarǵa arnalǵan demalys, kıim aýystyratyn, as ishýge arnalǵan, dýsh kabınalary ornatylǵan jýynatyn bólmeler bar. Onyń aýmaǵynda arnaıy tehnıka men júzý quraldaryna arnalǵan boks ashylǵan.
Mınıstr jergilikti avarııalyq-qutqarý jumystaryna arnalǵan jańa kólikterdiń kiltin tabys etti. Osy zamanǵy qutqarý quraldarymen jabdyqtalǵan bul mashınalar respýblıkalyq bıýdjet qarajaty esebinen satyp alynǵan. Sondaı-aq sý aıdyndarynda qutqarý operatsııalaryn júrgizý úshin biregeı júzý quraly – «Alligator» aeroqaıyǵy berildi.
Jańa stansanyń aýmaǵynda qutqarýshylardyń otbasylaryna arnalǵan eki qabatty jataqhana ashyldy. Jataqhanada 11 bólmede bar. Oǵan stansa qyzmetkerleri qonystandy.
– Ótken jyly qutqarýshylar 559 ret shaqyrtýǵa baryp, 100-den astam adamdy, onyń ishinde 70 balany qutqardy. Aýqymdy sý tasqyny kezinde jedel-qutqarý jasaǵynyń qyzmetkerleri 3 myńnan astam jergilikti turǵyndy evakýatsııalady. Bıyl Jaıyq ózeninde 9 jergilikti turǵyn, onyń ishinde 4 bala qutqaryldy, -dep málim etti jergilikti departamenttiń ımıdjdik jumys jáne syrtqy kommýnıkatsııalar toby.
Eske sala ketelik, buǵan deıin Atyraýda byltyr iz-túzsiz joǵalǵan boıjetkendi Jaıyqtan izdeý taǵy toqtatylǵanyn jazǵan edik.
