Atyraýda Jaıyq ózenine batqan úshinshi jasóspirimniń múrdesi sýdan shyǵaryldy

ATYRAÝ. KAZINFORM – Atyraý qalasynyń mańyndaǵy Bereke aýylynda 3 jasóspirim Jaıyq ózenine batyp ketken edi. Búgin, 27 tamyzda úshinshi jasóspirimniń múrdesi sýdan shyǵaryldy. 

Atyraý oblystyq tótenshe jaǵdaılar departamenti qoǵammen baılanys tobynyń aqparatyna qaraǵanda, saǵat 06:30-da úshinshi jasóspirimdi izdeý qaıta jalǵasqan. 

«Atyraý qalasyna jaqyn ornalasqan Bereke aýylynyń tusynda Jaıyq ózenine batyp ketken 3 jasóspirimniń birin izdeýge jedel qutqarý jasaǵynan 10 qutqarýshy, 5 júzý quraly tartyldy. Súńgýirler saǵat 9:15-te sý astynan úshinshi jasóspirimniń múrdesin taýyp, Jaıyq ózeniniń jaǵalaýyna shyǵardy. Eki jasóspirimniń múrdesi keshe, 26 tamyzda saǵat 18:25-te tabylǵan edi», - dep habarlady departamenttiń qoǵammen baılanys toby.

Belgili bolǵandaı, jasóspirimder Jaıyq ózeniniń arnaıy jasaqtalmaǵan tusynda sýǵa túsken. Úsh jasóspirim de 2008 jyly týǵan. 

«Atyraý oblysynda tabıǵı sıpattaǵy tótenshe jaǵdaıǵa baılanysty sý aıdyndarynda shomylý maýsymy resmı túrde áli ashylǵan joq. Sol sebepten qala turǵyndary men qonaqtaryna ózen-kólderde sýǵa túsýge bolmaıtynyn eskertemiz. Ásirese, kámeletke tolmaǵan balalardy sý aıdyndaryna jiberýge, ata-ananyń qaraýynsyz qaldyrýǵa bolmaıdy», - dep departamenttiń qoǵammen baılanys tobynan.

Eske sala ketelik, budan buryn Atyraý mańyndaǵy Bereke aýylynda 3 jasóspirimniń Jaıyqqa batyp ketkenin jazǵan edik.