Atyraýda Jaıyq ózenine batqan 14 jasar jasóspirim eki kúnnen keıin tabyldy

ATYRAÝ. KAZINFORM – Atyraýda eki kún buryn 14 jasar jasóspirim Jaıyq ózenine batyp ketken edi. Búgin qutqarýshylar jasóspirimniń múrdesin sýdan shyǵardy.

Atyraý oblystyq tótenshe jaǵdaılar departamentiniń qoǵammen baılanys tobynan málim etkendeı, 2010 jylǵy jasóspirim 22 tamyzda Jaıyq ózenine batyp ketken. 

«Ózenge batqan jasóspirimdi izdeý eki kún boıy júrgizildi. Búgin, 24 tamyzda saǵat 07:03 shamasynda sýǵa jasóspirim oqıǵa ornynan 12 shaqyrym qashyqtyqtan tabylyp, sýdan shyǵaraldy», -dep habarlady departamenttiń qoǵammen baılanys toby. 

Іzdestirý jumystaryna tótenshe jaǵdaılar deparatmentinen 10 jeke quram, 5 júzý quraly, 1 tehnıka tartylǵan. 

«Bıyl Atyraý oblysynyń sý aıdyndarynda qaıǵyly oqıǵalardyń aldyn alý jáne azamattardyń qaýipsizdigin qamtamasyz etý maqsatynda shomylý maýsymy áli resmı túrde ashylmaǵanyn habarlaımyz. Ózen-kólderdiń ruqsat etilmegen tusynda shomylý qaýipti ekenin eskertemiz. Mundaı qadamnyń sońy qaıǵyly jaǵdaıǵa ákelýi múmkin. Sol sebepten, oblys turǵyndary men qonaqtaryn qaýipsizdik sharalaryn saqtaýǵa jáne sýǵa shomylýdan bas tartýǵa shaqyramyz», - dep málim etti departamenttiń qoǵammen baılanys tobynan.

Eske sala ketelik, buǵan deıin Atyraýda Jaıyqqa batqan 14 jasar jasóspirim tabylmaı jatqanyn habarlaǵan edik. 

Sondaı-aq, Atyraýda Jaıyqqa batqan jasóspirimdi ıterip jiberýi múmkin ekenin jazǵan bolatynbyz.