Atyraýda Jaıyq ózenine batyp bara jatqan áıel qutqaryldy

ATYRAÝ. KAZINFORM – Atyraýda jazǵy shomylý maýsymy áli ashylǵan joq. Soǵan qaramastan Jaıyq ózenine sekirgen áıel batyp kete jazdady.

Atyraý oblystyq Tótenshe jaǵdaılar departamentiniń ımıdjdik jumys jáne syrtqy kommýnıkatsııalar tobynyń málimetinshe, áıel jaǵalaýdan ózenge sekirgen.

– Jaıyq ózeninde kezekti patrýldeý jrgizgen departament qyzmetkeri, azamattyq qorǵaý kapıtan Ernur Klaýov «Turǵyn úı qalashyǵy» shaǵyn aýdanynda áıeldiń adamnyń sýǵa sekirip ketkenin baıqap, dıspetcherlik pýltke habarlaǵan. Qutqarýshylar kelgenge deıin Jaıyq jaǵalaýynda serýendep júrgen 2 er adam áıeldi qutqarý úshin júzip baryp, sý betinde ustap turǵan, - dep habarlady departamenttiń ımıdjdik jumys jáne syrtqy kommýnıkatsııalar toby.

Sýdaǵy qaýipsizdikti qamtamasyz etý úshin kezekti reıdte júrgen jedel-qutqarý jasaǵynyń qutqarýshylary Arman Bahytjanuly men Áset Imashev jedel qutqarý jumysyna kirisip, áıeldi qutqaryp qalǵan. Sondaı-aq, sýǵa batqan áıeldi qutqarýǵa umtylǵan 2 er adamdy jaǵaǵa shyǵarǵan.

– Qutqarylǵan azamatshanyń jaǵdaıy jaqsy, onyń densaýlyǵyna zaqym kelmedi. Ol medıtsınalyq kómekti qajet etpedi, - dep málim etti departamenttiń ımıdjdik jumys jáne syrtqy kommýnıkatsııalar toby.

Eske sala ketelik, budan buryn Atyraý oblysynda shomylý maýsymy qashan ashylatyny belgisiz ekenin jazǵan bolatynbyz.

Sondaı-aq, Atyraýda byltyr joǵalǵan boıjetkenniń múrdesi Jaıyq jaǵalaýynan tabyldy.