Atyraýda Jaıyq ózeninde 50-ge jýyq keme qatysqan sherý ótti
ATYRAÝ. KAZINFORM – Atyraýda ótken «Qazynaly Kaspıı» halyqaralyq balyq festıvali aıasynda Jaıyq ózeninde kemeler sherýi uıymdastyryldy.
Festıvaldiń eń kórnekti is-sharalarynyń birine aınalǵan saltanatty sherýge 50-ge jýyq keme qatysty.
Beıbarys Sultan kópirinen bastalǵan sherý Turǵyndar qalashyǵy kópirine deıin jalǵasyp, ózen boıyna jınalǵan turǵyndar men qala qonaqtaryna erekshe áser syılady.
Kemeler sherýi óńirdiń ózen jáne teńiz mádenıetin, sý kóligi salasynyń áleýetin jáne Kaspıı mańynyń baı murasyn nasıhattaýǵa baǵyttaldy.
Ózen boıymen sap túzegen ondaǵan keme Atyraýdyń sý joldarymen tyǵyz baılanysty tarıhyn dáriptep, Jaıyq ózeniniń óńir ómirindegi erekshe ornyn aıshyqtady.
– «Qazynaly Kaspıı» festıvali Kaspıı óńiriniń balyq sharýashylyǵy dástúrlerin dáripteýge, ekologııalyq mádenıetti qalyptastyrýǵa jáne óńirdiń týrıstik áleýetin arttyrýǵa baǵyttalǵan. Kemeler sherýi – festıvaldiń eń kórnekti bólikteriniń biri. Bul shara arqyly Jaıyq ózeniniń óńir tarıhy men tirshiligindegi mańyzyn kórsetýdi maqsat ettik, – dep málimdedi Atyraý oblystyq Aýyl sharýashylyǵy jáne jer qatynastary basqarmasy.
Mundaı is-shara byltyr da uıymdastyrylǵan edi. Balyqshylar kúnine oraılastyrylǵan sherýge ótken jyly 30-ǵa jýyq keme qatysty.
Buǵan deıin Qazaqstannyń batysyndaǵy úsh óńirde brakonerlerden 8 tonnadan asa balyq pen 10 keli ýyldyryq tárkilengenin jazǵan edik.
