Atyraýda Jaıyq deńgeıiniń tómendeýi elektr óndirisine áser etti
ATYRAÝ.KAZINFORM — Atyraý oblysynda jyl basynan beri «109» biryńǵaı baılanys ortalyǵyna elektr jaryǵyna qatysty 40 myńnan astam ótinish túsken. Mamandar muny birneshe faktormen baılanystyrady: energetıkalyq nysandardaǵy aqaýlar, aýa temperatýrasynyń joǵary bolýy jáne Jaıyq ózenindegi sý deńgeıiniń tómendeýi elektr óndirisine áser etken.
Oblys ákimdigi taratqan aqparatqa súınsek, shaǵymnyń kóbeıýine jeke ınvestıtsııalar esebinen salynǵan turǵyn úı keshenderiniń elektr jelilerine óz betimen qosylýy negizgi sebep. Bul kóbine apatty jaǵdaılarǵa ákep soǵady. Taǵy bir másele «Atyraý Jaryq» JShS dıspetcherlik qyzmeti men keri baılanys júıesi jumysynyń tıimsizdiginde baılanysty.
— Turǵyndar jaryq óshken kezde dıspetcherlik qyzmetke habarlasý múmkin emesin jáne ótinishterdiń der kezinde qarastyrylmaıtynyn aıtyp jıi shaǵymdanady, -dedi oblys ákimi apparatynyń óńirlik damý jáne monıtorıng bóliminiń bas ınspektory Inamat Haıdarov.
«Atyraý Jaryq» JShS dırektory Meıirbek Ǵubashevtyń málimetinshe, kásiporyn 200 myńnan astam abonentti elektr energııasymen qamtamasyz etedi. Búginde energetıka nysandaryn kúrdeli jóndeý jospary 50%-ǵa oryndalǵan. Atyraý qalasy men Maqat aýdanynda «Tarıfti ınvestıtsııaǵa aıyrbastaý» baǵdarlamasy aıasynda jalpy uzyndyǵy 73,9 shaqyrymdyq 13 elektr jelisi nysany jańǵyrtylǵan.
— Oblys ortalyǵynda jaryqtyń kezek-kezek sónýine negizgi sebep -«KEGOC» AQ balansyndaǵy júktemeni avtomatty túrde shekteý júıesiniń jumysyna baılanysty syrtqy shekteýler. Avtomattandyrylǵan júıe generatsııalaý qýatynyń tapshylyǵy saldarynan 6 065 turǵyn úı men 983 zańdy tulǵa ornalasqan Atyraýdyń sol jaǵalaýyn elektrmen qamtamasyz etetin kerneýi 35 kV L-1Ts jáne L-5Ts áýe jelilerin ajyratyp turady, -dep habarlady oblys ákimdigi.
Budan bólek, zaqymdalǵan 10 kV rezervtik kabeldik jelileri bar kópqabatty turǵyn úı keshenderi, sondaı-aq teńgeriminde transformatorlyq qosalqy stantsııalary bar, biraq ıeleri kúzgi-qysqy kezeńge tehnıkalyq turǵyda daıyndalmaıtyn 3 315 tutynýshynyń beıqamdyǵy da máseleni kúrdelendirip otyr.
— Júktemeni avtomatty azaıtý júıesine qatysty suraq kóp. Biz birneshe ret júktemeni bólýdiń balama shemasyn usyndyq, biraq másele áli kúnge deıin sheshimin tapqan joq. Jeke jáne ıesiz jatqan elektr jelileri de óz aldyna bólek másele. Sondaı-aq «Beıneý-220» qosalqy stantsııasyndaǵy aǵyndy avtomatty baqylaý júıesiniń durys jumys istemeýi de apatty jaǵdaılardyń týyndaý yqtımaldyǵyn arttyrady, -dedi «Atyraý Jaryq» JShS dırektory Meıirbek Ǵubashev.
Oblys bıligi jaýapty mekeme basshylaryna problemaly yqsham aýdandarǵa erekshe kóńil bólýdi, «Atyraý Jaryq» JShS apattyq brıgadalarynyń jumysyn jandandyrýdy, elektr jelilerindegi apattyń aldyn alý boıynsha qajetti sharalardy qabyldaýdy, sondaı-aq kásiporynnyń dıspetcherlik qyzmetiniń jumysyn jetildirýdi, halyqpen tıimdi keri baılanys ornatyp, apatty jaǵdaıda shuǵyl áreket etýdi tapsyrdy.
«KEGOC» AQ fılıalynyń óńirlik dıspetcherlik ortalyǵy basshysynyń mindetin atqarýshy Baýyrjan Baǵytovtyń sózinshe, fılıal ıeliginde jalpy qýaty 1 450 megavolt-amperlik 2 391 shaqyrym elektr jelisi jáne kerneýi 220 kılovolt jeti qosalqy stantsııa bar. 2023 jyly «Batys Qazaqstan — Atyraý — Mańǵystaý» ekinshi tranzıti paıdalanýǵa berilip, nátıjesinde jelilerdiń ótkizý qabileti tórt esege artqan. Soǵan qaramastan, óńir energojúıesinde generatsııalaý qýatynyń tapshylyǵy áli de bar.
— Qazirgi ýaqytta Atyraý oblysy 1 154 megavat energııa tutynady. «MAEK» JShS № 1 energoblogy men «Karabatan Utility Solutions» GTES № 4 týrbogeneratoryn apattyq jóndeý, sondaı-aq aýa temperatýrasynyń anomaldy joǵarylyǵy men Jaıyq ózenindegi sý deńgeıiniń tómendeýi elektr stantsııalarynda óndiriletin elektr energııasynyń kólemin azaıtyp, jaǵdaıdy kúrdelendire tústi, -delingen ákimdiktiń resmı habarlamasynda.
Nátıjesinde Reseıdiń Biryńǵaı energetıkalyq júıesi jaǵynan memleketaralyq tranzıt júktemesi ruqsat etilgen mánnen asyp ketken. Bul JAShJ júıesiniń avtomatty túrde iske qosylýyna sebep boldy. Atalǵan júıe úlken apattardyń aldyn alatyn jáne energojúıelerdiń parallel qyzmetiniń buzylýyna jol bermeıtin májbúrli qorǵanys sharasy ekenin atap ótti. Táýeldilikten tolyq qutylýǵa Batys óńirdi Qazaqstannyń Biryńǵaı energetıkalyq júıesine qosatyn kerneýi 500 kılovolt «Qarabatan — Ólke» elektr berý jelisiniń qurylysy múmkindik beredi. Jobany iske asyrý 2027 jylǵa josparlanǵan.
Eske salaıyq, óńirge qarasty Qurmanǵazy aýdanyndaǵy Azǵyr óńiri áli de Reseıdiń elektr jelisine táýeldi.
