Atyraýda Jaıyq boıyna 6,7 shaqyrym jaǵalaý salynady
ATYRAÝ. KAZINFORM — Atyraý oblysynyń Mahambet aýdanynda Jaıyq ózeniniń jaǵasyn bekitý jumysy birneshe eldi mekende júrip jatyr. Aýdan ortalyǵynda 4,5 shaqyrym jaǵalaý nyǵaıtylsa, Alǵa, Beıbarys jáne Taldykól aýyldaryndaǵy jumystyń jalpy uzyndyǵy 6,7 shaqyrymdy quraıdy.
Alǵa aýylynda uzyndyǵy 3,2 shaqyrym bolatyn ýchaskede qurylys-montajdaý jumysy jalǵasýda. Qazir jobanyń 55 paıyzy oryndalǵan.
Beıbarys aýylynda bıyl uzyndyǵy 1,7 shaqyrym jaǵalaýdy nyǵaıtý jumysy bastaldy. Qurylys ázirge bastapqy kezeńde.
Taldykól aýylyndaǵy joba 2025 jyldyń jeltoqsanynda qolǵa alynǵan. Munda ózen jaǵasyn beton jáne temirbeton plıtalarmen bekitý kózdelgen.
— Joba aıasynda turǵyndardyń serýendeýine arnalǵan jaıaý júrginshiler joly salynyp, jaryqtandyrý júıesi ornatylady. Demalys oryndyqtaryn qoıý da qarastyrylǵan. Qurylys jumysyn 2027 jyldyń qarasha aıynda aıaqtaý josparlanǵan. Qazir qurylys alańynda tórt KamAZ, bir kran jáne alty arnaıy tehnıka jumys istep jatyr, — dedi «Pavlodar ózen porty» AQ ýchaske basshysy Qýandyq Jumabaev.
Budan bólek, Saraıshyq, Sarytoǵaı jáne Esbol aýyldarynda, sondaı-aq Mahambet–Sarytoǵaı baǵytynda jaǵalaýdy bekitý jobalary ázirlenip jatyr. Bul ýchaskelerde jalpy uzyndyǵy 3,5 shaqyrym bóget salý josparlanǵan.
Jaǵalaýdy bekitý jumysy ózen sýynyń shaıyp ketý qaýpin azaıtýǵa, eldi mekenderdi qorǵaýǵa jáne turǵyndardyń qaýipsizdigin qamtamasyz etýge baǵyttalǵan.
Buǵan deıin elimizde jer silkinisinen, sý tasqynynan jáne órtten turǵyn úıdi mindetti saqtandyrý engiziletinin jazǵan edik.
