Atyraýda jastar forýmynda 500 myń teńgelik granttar tabystaldy
ATYRAÝ. KAZINFORM — Atyraýda eki kúnge sozylǵan «SARAISHYQ UPGRADE 2026» jastar forýmy aıaqtaldy. Bıyl forýmǵa qatysýǵa 1000-nan astam jas ótinim berip, irikteý nátıjesinde 300-ge jýyq qatysýshy joba jumysyna qatysty, dep habarlaıdy Óńirlik kommýnıkatsııalar qyzmeti.
Forýmnyń ekinshi kúni qatysýshylar alty baǵyt boıynsha sheberlik sabaqtaryna qatysyp, óz jobalaryn qorǵady. Sheberlik sabaqtaryn Oljas Nurbaı, Dastan Orazbekov, Farangıza Shýkasheva, Amangeldi Islam, Sandýǵash Abdıeva jáne Dáýit Suraǵan ótkizdi.
Jıynǵa Atyraý oblysy ákiminiń orynbasary Jasulan Bısembıev qatysyp, jastarǵa sáttilik tiledi. Sondaı-aq forýmnyń alty baǵyty boıynsha sheberlik sabaqtaryn ótkizgen spıkerlerge Atyraý oblysy ákiminiń alǵys hattary tabystaldy.
— Bıylǵy «SARAISHYQ UPGRADE 2026» forýmy da óz máresine jetti. Qatysýshylardyń belsendiligi jastardyń forýmǵa degen qyzyǵýshylyǵy joǵary ekenin kórsetti. Forým aıaqtalǵanymen, munda qorǵalǵan jobalar aldaǵy ýaqytta iske asyp, jalǵasyn tabady dep senemin. Barshańyzǵa sáttilik tileımin! — dedi Jasulan Bısembıev.
Qorytyndy keshte «Úzdik joba úshin Grant» baıqaýynyń jeńimpazdary anyqtaldy. Alty baǵyttyń árqaısysy boıynsha úzdik dep tanylǵan bir qatysýshyǵa 500 myń teńgeden grant tabystaldy.
Grant ıegerleri Astana qalasynan jáne Atyraý, Aqtóbe, Batys Qazaqstan oblystarynan kelgen qatysýshylar arasynan anyqtaldy.
Uıymdastyrýshylardyń aıtýynsha, forým barysynda usynylyp, qorǵalǵan jobalardy aldaǵy ýaqytta iske asyrýǵa qoldaý kórsetiledi. Bul jastardyń shyǵarmashylyq jáne ınnovatsııalyq bastamalaryn damytýǵa baǵyttalǵan.
