Atyraýda jasóspirimdi kóligimen qaǵyp, ólimine sebepker bolǵan polıtseı sottaldy
ATYRAÝ. KAZINFORM – ️Atyraý oblysynyń Qyzylqoǵa aýdanynda polıtsııa ınspektory mototsıklden qulaǵan jasóspirimdi qyzmettik kóligimen qaǵyp, ornynda kóz jumýyna sebepker bolǵan. Sot úkimimen polıtsııa ınpektory 2 jylǵa bas bostandyǵynan aıyryldy.
Qyzylqoǵa aýdandyq sotynda QR Qylmystyq kodeksiniń 345-babynyń 3-bóligimen aıyp taǵylǵan ınspektordyń qylmystyq isi qaraldy.
«Qyzylqoǵa aýdandyq polıtsııa bólimi patrýldik polıtsııa tobynyń ınspektory qyzmettik avtokólikpen áriptesi ekeýi kámeletke tolmaǵan eki jasósprimniń mototsıklmen júrgenin anyqtaǵan. Dybys belgisi arqyly toqtaýdy talap etken. Alaıda, kámeletke tolmaǵan júrgizýshi polıtsııa qyzmetkeriniń zańdy talaptaryna baǵynbaı, qozǵalysyn jalǵastyrǵan. Sottalýshy ony qýdalap kele jatqanda, jasóspirim mototsıkldiń rýline ıe bola almaı, jerge qulaǵan. Sol kezde ınspektor qaýipsizdik sharalaryn qoldanbaı, jol júrisi qaǵıdalaryn óreskel buzyp, jasóspirimdi qaǵyp ketken. Nátıjesinde jasóspirim oqıǵa ornynda esin jımastan qaıtys bolǵan», - dep habarlady aýdandyq sottan.
Prokýror sottalýshyny 2 jyl 6 aı merzimge bas bostandyǵynan aıyrýdy usynǵan. Al, jábirlenýshiniń ókili zańǵa saı jaza qoldanýdy suraǵan. Sottalýshy óziniń kinásin moıyndaǵan.
«Atalǵan qylmys onsha aýyr emes, abaısyzda jasalǵan áreketter sanatyna jatady. Jáne 5 jylǵa deıin bas bostandyǵynan aıyrý jazasy qarastyrylǵan. Sondyqtan, QR Qylmystyq kodeksiniń 55-babynyń 2-bóliginiń 1) tarmaǵyna sáıkes, jaza taǵaıyndaý osy baptyń sanktsııasynda kózdelgen eń joǵary merzimniń jartysynan aspaýǵa tıis. Bul – 2 jyl 6 aı. Sottalýshynyń ókinýi, asyraýynda kámeletke tolmaǵan balalarynyń bary, buryn sottalmaǵany jaza men qylmystyq jaýapkershilikti jeńildetetin mán-jaılar retinde tanyldy. Aýyrlatatyn mán-jaılar anyqtalmady. Sottalýshy aıyp taǵylǵan bapqa sáıkes kináli dep tanyldy. Oǵan 5 jyl merzimge kólik quraldaryn basqarý quqyǵynan, 2 jyl merzimge bas bostandyǵynan aıyrý jazasy taǵaıyndaldy», - dep málim etti Qyzylqoǵa aýdandyq sotynan.
Sot úkimi zańdy kúshine engen joq.
Eske sala ketelik, buǵan deıin Atyraýda jaramdylyq merzimi ótken taýar úshin 2 mln teńge suraǵan bloger sottalǵanyn jazǵan edik.
