Atyraýda jasqa tolmaǵan sábı aýrýhananyń jansaqtaý bóliminde qaıtys boldy

Atyraýda bıyl dúnıege kelgen sábı aýrýhananyń jansaqtaý bóliminde kóz jumdy. Oǵan bronhıt dıagnozy qoıylǵan, dep habarlaıdy Kazinform. Bul derekti Atyraý oblystyq densaýlyq saqtaý basqarmasynyń baspasóz qyzmeti rastady. 

Atyraý qalasyndaǵy №2 oblystyq aýrýhana ákimshiliginiń aqparatyna súıensek, naýqas sábı Q.A. bıyl 9-15 jeltoqsan aralyǵynda «ORVI. O.Bronhıt» dıagnozymen emdelgen. Onyń jaǵdaıy jaqsarǵan soń úıine jiberilgen.

Aýrýhanadan shyqqan kezde mekenjaıy boıynsha Atyraý qalasyndaǵy №1 emhanaǵa málimet berilgen. Ata-anasy 17 jeltoqsan kúni balasyn jeke klınıkaǵa aparyp, dárigerge qaratqan. Alaıda, 21 jeltoqsanda náresteniń dene qyzýy taǵy da kóterilip, jóteli kúsheıgen. Soǵan baılanysty naýqas sábı №2 oblystyq aýrýhanaǵa qaıta jatqyzylǵan.

«Dárigerler qoıylǵan dıagnozǵa baılanysty emdeý hattamasyna saı emdik jáne dıagnostıkalyq sharalardy júrgizýdi bekitti. Balada jedel vırýsty ınfektsııa aýyr aǵymda ótip, ókpe qabynýy asqynǵan. Osyǵan baılanysty sábı 23 jeltoqsan kúni jansaqtaý bólimine aýystyryldy. Barlyq reanımatsııalyq shara ótkizilgeninen qaramastan, ol shetinep ketti», - dep habarlady aýrýhananyń ákimshiligi.

Eske sala ketelik, budan buryn Atyraý oblysynda 29 jastaǵy áıel júktiliktiń 36-aptasynda qaıtys bolǵanyn habarlaǵan edik.

Sondaı-aq Atyraýda 51 jastaǵy áıel emhanada alǵan ýkoldan soń kóz jumǵanyn jazǵan bolatynbyz.