Atyraýda jasyl jelekke kútim jasaý konkýrsyna qatysýshylardyń quqyǵy shektelgen

ATYRAÝ. KAZINFORM — Atyraýda jasyl jelekti kútim jasaý konkýrsyna qatysýshylardyń quqyǵy shekteıtin talaptar bolǵan.

Bul týraly Básekelestikti qorǵaý jáne damytý agenttiginiń Atyraý oblysy boıynsha departamentinen habarlady. 

— «Atyraý qalasynyń jasyl jelekterine kútim jasaý» memlekettik-jekemenshik áriptestik jobasy boıynsha konkýrs uıymdastyrý kezinde básekelestik qaǵıdattary buzylǵan. Osyǵan baılanysty júrgizilgen tergep-tekserý barysynda Atyraý oblysynyń Tabıǵı resýrstar jáne tabıǵat paıdalanýdy retteý basqarmasy daıyndaǵan konkýrstyq qujattamada áleýetti jekemenshik áriptesterdiń qatysýyn shekteıtin negizsiz talaptar bolǵany anyqtaldy. Basqarma tarapynan áleýetti qatysýshylardyń quqyqtaryn shekteıtin jáne naryqtaǵy adal básekelestikke kedergi keltiretin konkýrs sharttary belgilengen, — dep habarlady jergilikti departamentten.

Atyraý oblystyq sotynyń ákimshilik ister jónindegi sot alqasynyń sheshimimen basqarmanyń áreketinde básekelestikti qorǵaý salasyndaǵy zańnama buzyldy dep tanylǵan. Sot departamenttiń quqyqtyq ustanymy men buıryǵyn qoldady. 

— Sot alqasy basqarma basshylyǵy men «Atyrau Innovations» JShS atyna memlekettik-jekemenshik áriptestik jobalary boıynsha konkýrstyq qujattamany daıyndaý kezinde osyndaı buzýshylyqtarǵa jol bermeý jóninde sharalar qabyldaýdy uıǵaratyn jeke uıǵarym shyǵardy. Osylaısha basqa da áleýetti jekemenshik áriptester úshin «Atyraý qalasynyń jasyl jelekterine kútim jasaý» jobasy boıynsha konkýrsqa qatysýǵa qoljetimdilikti shekteıtin tosqaýyl joıyldy. Bul óńirde osyndaı jobalardy iske asyrýǵa básekelestik, ashyqtyq jáne teń qoljetimdilik qaǵıdattarynyń saqtalýyn qamtamasyz etedi, — dep málim etti departamentten.

Eske sala keteıik, buǵan deıin ekologııasy nashar Atyraý oblysynda jasyl jelek ósirý jaıyn jazǵan edik.