Atyraýda jarty jylda 335 maldan brýtsellez anyqtaldy
ATYRAÝ. KAZINFORM – Atyraý oblysynda bıylǵy alǵashqy alty aıda brýtsellezge qarsy júrgizilgen zertteý barysynda 335 bas maldan aýrý anyqtaldy. Aýrý juqtyrǵan mal túgeldeı sanıtarııalyq talapqa saı joıylyp, ıelerine bıýdjetten ótemaqy tólendi.
Oblystyq aýyl sharýashylyǵy jáne jer qatynastary basqarmasynyń málimetine sáıkes, bıylǵy alty aıda brýtsellezdi anyqtaý úshin 563 275 bas maldan qan synamasyn alý josparlanǵan. Zertteý nátıjesinde 138 bas iri qara, 195 usaq mal jáne 2 túıeden brýtsellez anyqtaldy. Aýrýǵa shaldyqqan 335 mal arnaıy soıý oryndarynda sanıtarııalyq talapqa sáıkes joıyldy.
Brýtsellezge oń nátıje bergen mal ıelerine jergilikti bıýdjetten 11 mln 668 myń teńge ótemaqy tólengen.
Jyl basynan beri ınfektsııalyq rınotraheıttiń 11 oshaǵy anyqtaldy. Onyń tórteýi Qurmanǵazy, tórteýi Isataı aýdandarynda, bir-birden Jylyoı, Qyzylqoǵa jáne Inder aýdandarynda tirkelgen.
Oblystyq aýyl sharýashylyǵy jáne jer qatynastary basqarmasynyń basshysy Amangeldi Salamattyń sózinshe, vırýstyq dıareıa men ınfektsııalyq rınotraheıt aýrýyn juqtyrǵan mal sanynda ózgeris joq. Naýryzdaǵy kórsetkish, ıaǵnı 7200 saqtalyp otyr. Degenmen qora-jaılarda em alyp jatqan iri qaralar bar.
Oblysta janýarlardyń asa qaýipti segiz aýrýyna qarsy vaktsınatsııa júrgizilýde. Bıyl 1 mln 748 myń 875 doza vaktsına egý josparlanǵan. Qazirgi ýaqytta onyń 1 mln 485 myń 900 dozasy salynǵan. Vaktsına respýblıkalyq bıýdjet esebinen jetkizilgen.
Qazir Atyraý oblysynda 8 veterınarııalyq stansa men 68 veterınarııalyq pýnkt jumys isteıdi. Onda 311 veterınarııalyq maman qyzmet atqarady.
Buǵan deıin Atyraýda shóptiń bir oramy 6,5-12 myń teńgege satylyp jatqanyn jazǵanbyz.
