Atyraýda jarty jylda 21,3 myń gektar jer memleketke qaıtaryldy
ATYRAÝ. KAZINFORM — Atyraý oblysynda bıyl paıdalanylmaı jatqan aýyl sharýashylyǵy maqsatyndaǵy 40 myń gektar jerdi memleket menshigine qaıtarý josparlanǵan. Osy ýaqytqa deıin jalpy aýmaǵy 21,3 myń gektar bolatyn 55 jer ýchaskesi memleketke qaıtaryldy.
Oblystyq aýyl sharýashylyǵy jáne jer qatynastary basqarmasynyń málimetinshe, bul jumys Aýyl sharýashylyǵy mınıstrligi jyl saıyn bekitetin josparǵa sáıkes júrgizilýde. 2026 jyldyń basynan beri jalpy aýmaǵy 21,3 myń gektardy quraıtyn 55 jer ýchaskesi memleket menshigine qaıtarylǵan. Onyń ishinde 20,4 myń gektary — jaıylym, 0,2 myń gektary — egistik, al 0,7 myń gektary ózge sanattaǵy aýyl sharýashylyǵy alqaptary.
— Ótken jyly óńirde paıdalanylmaı jatqan aýyl sharýashylyǵy maqsatyndaǵy jalpy aýmaǵy 61,6 myń gektar bolatyn 106 jer ýchaskesi memleketke qaıtarylǵan edi. Onyń 56,7 myń gektary jaıylym, 0,2 myń gektary egistik jáne 4,7 myń gektary basqa alqap sanatyna jatady, — dep málimdedi basqarma.
Basqarma deregine sáıkes, qaıtarylǵan jerler keıin aýyl sharýashylyǵy aınalymyna qaıta engizilip, konkýrs nemese aýktsıon arqyly jańa jer paıdalanýshylarǵa beriledi.
Máselen, 2025 jyly konkýrs nátıjesinde jalpy aýmaǵy 83,7 myń gektar bolatyn 197 jer ýchaskesi tabystalǵan. Al bıyl alty aıda konkýrs arqyly 13,2 myń gektardy quraıtyn 36 jer ýchaskesi jańa jer paıdalanýshylarǵa berildi.Ótken jyly jalpy aýmaǵy 10,5 gektar bolatyn 23 jer ýchaskesi aýktsıon arqyly tabystalsa, 2026 jyldyń birinshi jartyjyldyǵynda jalpy aýmaǵy 27,7 gektardy quraıtyn 38 jer ýchaskesi berilgen.
Buǵan deıin Jetisý oblysynda 200 gektar qunarly jer memleket menshigine qaıtarylǵanyn jazǵan edik.
