Atyraýda jarylǵan elektr baǵanalaryn aýystyrý jumysy sozylyp ketti
ATYRAÝ. KAZINFORM — Mahambet aýdanynda elektr jelileri tartylǵan beton baǵanalardyń sapasyna qatysty másele birneshe jyldan beri sheshimin tappaı keledi.
2021 jyly «Laıge» JShS ornatqan 326 temirbeton tirekten jaryq anyqtalyp, merdiger sot sheshimimen olardy aýystyrýǵa mindettelgen. Alaıda kompanııa sot sheshimin bir jyldan astam ýaqyt erikti túrde oryndamaǵan. Al aýdan ákimdigi óz qaramaǵyndaǵy taǵy 200 beton baǵanany aýystyrýǵa bıýdjetten 9,2 mln teńge bólgen.
Mahambet aýylyndaǵy elektr baǵanalarynyń birqatarynda jaryq 2023 jyldan bastap baıqala bastaǵan. Aýdan ákimdiginiń málimetinshe, 2021 jyly aýylda «Laıge» JShS 300-den astam beton baǵana ornatqan. Bul jumys Atyraý oblysynyń energetıka jáne turǵyn úı-kommýnaldyq sharýashylyq basqarmasynyń tapsyrysy negizinde istelgen.
Aqaý anyqtalǵannan keıin merdigerdiń kepildik mindettemelerin oryndaý máselesi sotta qaralǵan. Atyraý oblysynyń mamandandyrylǵan aýdanaralyq ekonomıkalyq soty ótken jyly tamyzda «Laıge» JShS-ne jaramsyz tirekterdi aýystyrýdy mindettedi. Qazanda sot sheshimi zańdy kúshine engen. Al apellıatsııalyq satydaǵy sot 24 jeltoqsanda ony ózgerissiz qaldyrǵan.
Oblystyq energetıka jáne TÚKSh basqarmasynyń habarlaýynsha, sot sheshimi 2024 jylǵy 29 tamyzdaǵy aqaýlyq aktisinde kórsetilgen tirekterge qatysty. Qujat boıynsha Sarytoǵaı, Mahambet-1 («Samal», «Jasyl beldeý») jáne Mahambet-2 («Narkesken») eldi mekenderindegi 0,4/10 kV jelilerge ornatylǵan 326 temirbeton baǵanany sapaly tirekterge aýystyrý qajet.
— Alaıda «Laıge» JShS sot sheshimin erikti túrde oryndamaǵandyqtan, ony májbúrlep oryndatý maqsatynda atqarýshylyq qujat 2026 jylǵy qyrkúıek aıynda jeke sot oryndaýshysyna joldandy. Qazirgi ýaqytta sot sheshiminiń oryndalýy jeke sot oryndaýshysynyń óndirisinde. «Laıge» JShS búgingi kúni tirekterdi aýystyrýdy bastady, 2026 jylǵy qarasha aıynyń sońyna deıin tolyq aıaqtaıdy dep kútilýde, — dep málimdedi oblystyq energetıka jáne TÚKSh basqarmasy.
Búginde «Laıge» JShS 326 baǵananyń 100-in aýystyrǵan. Alaıda másele munymen shektelmeıdi. Aýdan ákimdiginiń qaramaǵyndaǵy elektr jelileri men kóshe jaryǵy baǵanalaryna júrgizilgen zerdeleý kezinde tehnıkalyq jaı-kúıi qanaǵattanarlyqsyz taǵy 200 tirek anyqtalǵan. Olardy aýystyrýǵa jergilikti bıýdjetten 9 mln 280 myń teńge bólingen. Bul jumysty aýdan ákimdiginiń tapsyrysymen «URKEN Group» JShS istep jatyr.
— Merdiger uıym jumysqa 2026 jyldyń 5 qazanynda kiristi. Búginde 100-den astam beton baǵana aýystyryldy. Qalǵan baǵanalardy aýystyrý jumystary belgilengen tártippen jalǵasýda. Atalǵan jumysty jyl sońyna deıin aıaqtaý josparlanyp otyr, — dep habarlady Mahambet aýdany ákimdiginiń baspasóz qyzmeti.
Bul jerde eki bólek máseleni ajyratyp alǵan jón. Aýdan ákimdigi aýystyryp jatqan 200 baǵana men «Laıge» JShS sot sheshimi boıynsha almastyrýǵa mindettelgen 326 tirektiń bir-birine qatysy joq ekenin naqtylady.
Buǵan deıin Oljas Bektenov Qazaqstannyń elektr energetıkasy jobalaryn qaraǵanyn jazǵan edik.
