Atyraýda janarmaı beketindegi jarylysqa kináli adam 40 mln teńge ótemaqy tóleıdi
ATYRAÝ. KAZINFORM – Byltyr Atyraý oblysynyń Jylyoı aýdany Qulsary qalasyndaǵy «Nıet» janar-jaǵarmaı quıý beketinde bolǵan jarylysqa qatysty qylmystyq is boıynsha alǵashqy ınstantsııadaǵy sot úkimi shyqty.
Sot aıyptalýshyny kináli dep tanyp, bas bostandyǵynan aıyrý jáne moraldyq ótemaqy óndirý týraly sheshim shyǵardy.
Sot otyrysynda sýdıa aıyptalýshynyń kinási dáleldengenin aıtyp, sheshimdi jarııalady. Aıyptalýshy QR Qylmystyq kodeksiniń 281 baby 3 bóligi (Jarylys qaýpi bar obektilerde qaýipsizdik qaǵıdalaryn buzý) boıynsha kináli dep tanyldy. Oǵan 3 jyl 6 aı merzimge bas bostandyǵynan aıyrý jazasy taǵaıyndaldy.
- Sondaı-aq 3 jyl merzimge ónerkásiptik qaýipsizdik salasyndaǵy belgili bir qyzmetpen aınalysý quqyǵynan aıyrý túrindegi qosymsha jaza qoldanylsyn. «Nıet LTD» JShS-nen jábirlenýshilerdiń paıdasyna moraldyq ótemaqy óndirilsin», — dedi sýdıa Ardaq Tólebaeva.
Sottalýshy jazasyn qylmystyq-atqarý júıesiniń eń tómengi qaýipsizdik mekemesinde óteıtin boldy.
Sot sheshimine sáıkes, osy jarylys saldarynan kóz jumǵan erli-zaıyptynyń tórt balasynyń árqaısysyna 10 mıllıon teńgeden moraldyq ótemaqy tóleý mindetteldi.
Tergeý derekterinde №3 gaz quıý stantsııasy aýmaǵyndaǵy 25 tekshe metrlik suıytylǵan gaz rezervýary tehnıkalyq turǵydan kýálandyrylmaǵan jáne zań boıynsha tirkelmegen, sondaı-aq qaýipti retinde esepke alynbaǵany belgili boldy.
Jábirlenýshi tarap ókili Aqan Habdeshev moraldyq ótemaqy mólsherine kelispeıtinin bildirip, apellıatsııalyq shaǵym túsiriletinin aıtty.
- Biz bas bostandyǵynan aıyrý jazasymen kelisemiz. Biraq moraldyq ótemaqy kólemi óte az dep esepteımiz, — dedi ol.
Oqıǵa saldarynan erli-zaıypty qaza taýyp, tórt bala ata-anasyz qalǵan. Jarylys kezinde alty kólik órtenip, úsh birqabatty jáne bir ekiqabatty ǵımarat búlingen. Apat aýmaǵy shamamen 400 sharshy metrdi qamtyǵan.
Buǵan deıin oblystyq tótenshe jaǵdaılar departamenti janarmaı beketinde jarylystyń sebebin aıtty.
Eske salaıyq, 30 mamyrda saǵat 18:45 shamasynda Qulsary qalasyndaǵy janarmaı beketinde jarylys bolyp, 14 adam zardap shekti. Onyń 2-eýi qaıtys boldy.
