Atyraýda jańa týǵan sábılerge Tasqynbek pen Tasqynbı esimi qoıylǵan
ATYRAÝ. KAZINFORM – Atyraýda jańa týǵan sábılerge Tasqynbek pen Tasqynbı esimi qoıylǵan.
Atyraý oblystyq densaýlyq saqtaý basqarmasynyń deregi qaraǵanda, tabıǵı sıpattaǵy tótenshe jaǵdaı jarııalanǵannan beri 1846 sábıdiń ómirge kelgeni tirkelgen. Nárestelerdiń arasynda 961 ul, 885 qyz bar.
«Atyraý qalasynda bir otbasy dúnıege kelgen tuńǵysh ulyn Tasqyn-bı esimimen ataýdy jón kórip otyr. Al, Inder aýdanyndaǵy sábıdiń birine Tasqynbek esimi qoıyldy. Bul – otbasyndaǵy segizinshi bala», -deıdi oblystyq azamattyq hal aktilerdi tirkeý basqarmasynyń basshysy Almagúl Tóremuratova.
Bir qyzyǵy eki ul da bir kúnde ómirge kelgen. Nárestelerdiń týǵan kúni – 29 sáýir.
Sońǵy statıstıkalyq málimetke qaraǵanda, Atyraý qalasynda Muhammad esimi kóp berilgen. Jyl basynan beri 32 sábı atalǵan esimdi ıelenip otyr. Al, 19 balaǵa Hamza, 15 ulǵa Aısultan esimimen týý týraly kýálik alynǵan.
Qyzdardyń arasynda Aısha esimi tanymal bolyp, 33 burymǵa qoıylǵan. Budan soń 31 Medına, 29 Asylym, 27 Safııa esimi tirkelgen.
Jylyoı aýdandyq ortalyq aýrýhanasynyń dırektory Asýlan Abdrahmanovtyń aıtýynsha, 5 sáýirden mamyrǵa deıin júkti analar 42 sábıdi dúnıege ákelgen. Nárestelerdiń arasynda 20 ul, 22 qyz bar.
Sonyń biri – Qulsary qalasynyń turǵyny Juldyz Jandosqyzy 6 sáýirge qaraǵan túnde bosanǵannan. Birneshe saǵattan keıin Beıneýdegi aýrýhanaǵa evakýatsııalanǵan.
«Ulymdy túngi saǵat 00:00-de ómirge ákeldim. Sol kezde Qulsary qalasyna tasqyn sý kirip, jurt ábigerge túsip jatqan edi. Bul – tuńǵyshym. Sodan bolar, sábıim úshin alańdadym», - deıdi Juldyz Jandosqyzy.
Jas ananyń aıtýynsha, ata-enesi nemeresine Bekzat esimin bergen. Alaıda, sábıdiń búrkenshik esimi de bar.
«Biz ony Tasqynbaı dep erkeletemiz. Óıtkeni, sý tasqyny kezinde ómirge keldi. Týystarymyz da osylaı ázildeıdi», -deıdi Juldyz Jandosqyzy.
Eske sala ketelik, budan buryn Jylyoı aýdanynda turatyn analar 5 sáýirden beri 42 sábıdi dúnıege ákelgenin jazǵan edik.
