Atyraýda «Jańa Konstıtýtsııa – jarqyn bolashaq» atty gala-kontsert ótti
ATYRAÝ. KAZINFORM – Atyraýda referendýmdy qoldaýǵa arnalǵan «Jańa Konstıtýtsııa – jarqyn bolashaq» atty gala-kontsert ótti. Kontsert barysynda qatysýshylar el bolashaǵy men aldaǵy ózgerister jóninde pikir almasyp, memleketimizdiń negizgi zań jobasyn talqylaýǵa belsendi qatysty. Іs-sharaǵa zııaly qaýym ókilderi, jastar, eńbek ujymdary men qoǵamdyq birlestik, jalpy sany 2 500 adam qatysty.
Resmı bólimde spıkerler adam quqyqtaryn qorǵaýdy kúsheıtý, azamattardyń memlekettik sheshimder qabyldaý úderisine qatysýyn keńeıtý, volonterlik qozǵalysty damytý, sondaı-aq bılik tarmaqtarynyń tepe-teńdigin nyǵaıtý jáne memlekettik basqarýdyń ashyqtyǵyn arttyrý máselelerine keńinen toqtaldy.
Jańa jobaǵa qatysty óz pikirin belsendi jastardyń ókili, kompozıtor Baýyrjan Aqtaı bildirdi. Onyń aıtýynsha, Konstıtýtsııaǵa engiziletin ózgerister Ádiletti Qazaqstannyń jańa paraǵyn ashyp, árbir azamattyń pikiri eskeriletin jáne quqyqtary senimdi qorǵalatyn qoǵam qalyptastyrýǵa negiz bolady.
Sóz sóılegender bilim men ǵylymdy eldiń ornyqty damýynyń irgetasy retinde erekshe atap ótti. H. Dosmuhamedov atyndaǵy Atyraý ýnıversıtetiniń rektory Salamat Idrısov jańartylǵan Konstıtýtsııa bilim men ǵylym úshin jańa dáýirdiń bastaýy bolatynyn aıtty.
– Negizgi zańda akademııalyq erkindik qaǵıdattarynyń jáne ǵylymı-tehnıkalyq shyǵarmashylyq kepildikteriniń bekitilýi ýnıversıtetter men zertteý ortalyqtarynyń damýyna berik quqyqtyq negiz qalaıdy, - dedi ol.
Bul – ǵylymı qaýymdastyq úshin ulttyq jobalar men strategııalyq baǵdarlamalardy júzege asyrýǵa júıeli úles qosatyn tarıhı múmkindik.
Sonymen qatar, onyń aıtýynsha, mindetti bazalyq bilimniń jáne joǵary bilimniń konkýrstyq negizde qoljetimdi bolýynyń bekitilýi teń múmkindikter qaǵıdatyn kúsheıtip, básekege qabiletti adamı kapıtal qalyptastyrýǵa jol ashady.
Kontsertke qatysýshylar usynylyp otyrǵan ózgerister ádilettilik, zań ústemdigi jáne azamattardyń zań aldyndaǵy teńdigi qaǵıdattaryn nyǵaıtýǵa baǵyttalǵan degen ortaq pikirge keldi. «Amanat» partııasynyń oblystyq fılıalynyń tóraǵasy Beıbit Murzaǵalıev jańa jobany tek quqyqtyq qujat retinde emes, Qazaqstannyń ıntellektýaldyq bolashaǵyna salynǵan strategııalyq ınvestıtsııa retinde qarastyrý qajet ekenin atap ótti.
– Bilim men ǵylymdy ulttyq basymdyqtar retinde aıqyndaý – tehnologııalyq serpiliske, turaqty ekonomıkaǵa jáne eńbektiń qoǵamdaǵy basty qundylyq retindegi rólin arttyrýǵa bastaıtyn mańyzdy qadam, - dedi spıker.
Bul shara óńir úshin erekshe mańyzǵa ıe. Bul týraly jastar máslıhatynyń músheleri, aǵaıyndy Madına jáne Aqerke Erkinovalar atap ótti.
– Búgingi tańdaý – erteńgi bolashaǵymyzdyń negizi. Biz, jas býyn ókilderi, zańdy reformalaýdy qoldaımyz. Konstıtýtsııa azamattardyń quqyqtary men bostandyqtaryn senimdi qorǵaıtynyna senimdi bolý mańyzdy, - dedi olar.
Jıyn barysynda spıkerlerdiń, jastar kóshbasshylary men qoǵam qaıratkerleriniń áserli sózderi aıtylyp, birlik pen jasampazdyq rýhy sezildi. Qatysýshylar spıkerlerge suraq qoıyp, pikir almasyp, óz azamattyq ustanymdaryn bildirýge múmkindik aldy.
Resmı bólimnen keıin jergilikti ónerpazdar jáne estrada ánshileri Nurbolat Abdýllın men BYTANAT ásem ánderin oryndap, kórermenge kóterińki kóńil kúı syılady.
Árbir áýen, árbir sóz elimizdiń basty kúshi – onyń adamdary, olardyń talanty men bilimi, ádiletti qoǵam qurýǵa degen umtylysynda ekenin aıshyqtaı tústi.
Kontserttiń qorytyndysy erekshe áserli boldy: oryndaýshylar men kórermender Atyraý týraly ándi birge shyrqap, el bolashaǵy dál osy jerde, dál qazir qalyptasyp jatqanyn aıqyn kórsetti. Merekelik kóńil-kúı zaldy kernep, jarqyn úmit pen shabyt syılady. Jańa Konstıtýtsııa elimizdiń nyq ári gúldengen bolashaǵynyń berik irgetasy ekeni taǵy bir márte aıqyndaldy.