Atyraýda jańa qoqys polıgonyn salý jumysy ýaqytsha toqtap tur
ATYRAÝ.KAZINFORM — 2024 jyly bolǵan tasqynǵa baılanysty Atyraý qalasynda polıgon salatyn aýmaq sý astynda qalǵan. Arnaıy aımaqtaǵy ór sýy 2025 jyldyń jazynda qurǵaǵan. Bul jańa polıgon qurylysynyń keshigýine sebep bolyp otyr.
Atyraý qalasy ákimi Shákir Keıkınniń aıtýynsha, polıgon qurylysyn bıyl bastaý josparlanyp otyr.
Onyń qurylysyna Mahambet aýdanyna qarasty Almaly aýyldyq okrýginen (Atyraý qalasynan shamamen 15 shaqyrym jerde) 50 gektar jer telimi bólingen. Qazirgi ýaqytta qala irgesindegi qoldanystaǵy polıgonnyń bıiktigi 6 qabatty úımen teń. Ol 1970 jyldardan beri jumys istep tur.
— Bul jumysqa jaýapty merdiger mekeme belgili. Búginde jobaǵa túzetýler engizilip jatyr. Burynǵy joba boıynsha polıgondy jerdi qazyp salý kerek edi. Jerasty sýynyń kóterilýine baılanysty jobany ózgertýge týra kelip otyr. Jańa polıgon salynatyn aýmaq bıiktigi 6 metr bolatyn dambymen qorshalady, — dedi qala ákimi Shákir Keıkın.
Jobanyń alǵashqy quny 6 mıllıard teńgege jýyqtaǵan edi. Sheneýnikterdiń sózinshe, naqty kerek qarjynyń somasy jobaǵa ózgeris engizilgennen keıin ǵana belgili bolady.
Aıta keteıik, 2025 jyldan búgingi kúnge deıin Atyraý qalasy men qala aýmaǵyna qarasty eldi mekenderden 166 myń tekshe metr qoqys shyǵarylǵan.
Osyǵan deıin ótken jyly Atyraýda 7 640 ekologııalyq quqyq buzýshylyq anyqtalǵanyn jazǵan edik.