Atyraýda jalǵan aqparat úshin jolaýshy reıske jiberilmedi
ATYRAÝ.KAZINFORM — Atyraý halyqaralyq áýejaıynda «Atyraý-Shymkent» baǵytyndaǵy № 788 reısine tirkelý kezinde 34 jastaǵy Túrkistan oblysynyń turǵyny qyzmetkerlerdiń «zańǵa qaıshy zattar bar ma?» degen suraǵyna «tapansha bar» dep jaýap bergen. Jolaýshy reıske jiberilmedi.
Oqıǵa 19 mamyr kúni bolǵan. Tekseris barysynda azamattyń jalǵan aqparat aıtqany belgili boldy.
— Atalǵan derek boıynsha QR Ákimshilik quqyq buzýshylyq týraly kodeksiniń 434 baby 1 bóligine saı ákimshilik hattama jasaqtalyp, Atyraý qalasynyń mamandandyrylǵan ákimshilik sotyna joldandy. Kóliktegi polıtsııa departamenti azamattardy áýejaıda jalǵan aqparat bermeýge jáne qoǵamdyq qaýipsizdik talaptaryn qatań saqtaýǵa shaqyrady, -delingen Atyraý stantsııasyndaǵy kóliktegi polıtsııa bóliminiń málimdemesinde.
Buǵan deıin poıyzda mas kúıde júretin jolaýshylar kóbeıgeni jóninde jazǵan edik.
