Atyraýda jalǵan 8 750 AQSh dollaryn satýǵa shyǵarǵan jigit ustaldy
ATYRAÝ. KAZINFORM — Atyraýda 24 jastaǵy jigit jalǵan 8 750 AQSh dollaryn satpaq bolǵan.
Atyraý oblystyq polıtsııa departamentiniń baspasóz qyzmetinen málim etkendeı, kúdiktiden 50 dollardyń 175 danasy tárkilengen.
— Uıymdasqan qylmysqa qarsy is-qımyl basqarmasynyń qyzmetkerleri jedel izdestirý is-sharasy kezinde 50 AQSh dollaryn satýmen aınalysqan 24 jastaǵy er adamdy ustady. Tintý kezinde kúdiktiden jalǵan 50 dollarlyq kýpıýranyń 175 danasy tabyldy. Jalǵan banknottyń jalpy somasy — 8 750 AQSh dollary. Kúdiktiniń shet memleketterden kólik ákelip, satatyndyǵy anyqtaldy, — dep habarlady departamentti baspasóz qyzmeti.
Qazir kúdiktiniń jalǵan dollardy qaıdan alǵany jáne qaıda ótkizbek bolǵany tekserilip jatyr.
— Kúdiktige qatysty shetel valıýtasyn nemese shetel valıýtasyndaǵy baǵaly qaǵazdardy ótkizý maqsatynda jasaý nemese saqtaý, ótkizý boıynsha qylmystyq is qozǵaldy. Sotqa deıingi tergep-tekserý júrgizý bastaldy. Ózge aqparat tergeý múddesine sáıkes jarııalaýǵa jatpaıdy, — dep málim etti departamenttiń baspasóz qyzmetinen.
Eske sala ketelik, budan buryn Atyraýda qylmystyq top quryp, salyq tóleýden jaltarǵan kúdiktige izdeý jarııalanǵanyn habarlaǵan edik.