Atyraýda Jaıyq jaǵalaýynan ruqsatsyz qazylǵan káriz qudyǵy tabyldy
ATYRAÝ. KAZINFORM – Atyraýda Jaıyq jaǵalaýynan ruqsatsyz qazylǵan káriz qudyǵy tabyldy.
Áleýmettik jelide Jaıyq ózeniniń jaǵalaýynda káriz qudyǵy qazylǵany týraly vıdeo júkteldi.
Osyǵan oraı Atyraý qalalyq ákimdiginiń baspasóz qyzmeti túsinik berdi.
«Atyraý qalalyq qarjy bólimi men «Tsentr podderjkı predprınımatelstva «Evrazııa» JShS arasynda 2019 jylǵy 28 mamyrda dene shynyqtyrý-saýyqtyrý sport kesheni aýmaǵyndaǵy jaǵajaı 10 jylǵa satyp alý quqyǵynsyz senimgerlik basqarýǵa berý týraly arnaıy shart jasaqtaldy. Alaıda, atalǵan senimgerlik basqarýshyǵa jaǵajaı aýmaǵyna káriz qazýǵa ruqsat berilgen joq. Atyraý qalalyq qarjy bólimi seriktestik tarapynan senimgerlik basqarý shartynyń mindettemelerin oryndalmaýyna baılanysty jáne qalalyq prokýratýranyń usynysy negizinde shartty buzý týraly sotqa talap aryz berildi», - dep habarlady ákimdiktiń baspasóz qyzmeti.
Atyraý oblysynyń mamandandyrylǵan aýdanaralyq ekonomıkalyq soty 2024 jylǵy 25 qańtarda «Tsentr podderjkı predprınımatelstva «Evrazııa» JShS tarapynan mindettemelerdiń oryndalmaýyna baılanysty senimgerlik basqarý shartyn buzý týraly sheshim shyǵarǵan. Biraq, seriktestik basshylary bul sheshimmen kelispeı, apellıatsııalyq shaǵym túsirgen. Apellıatsııalyq shaǵym Atyraý oblystyq sotynyń azamattyq ister boıynsha apellıatsııalyq sot alqasynda qaralyp, birinshi satydaǵy sot sheshimi kúshinde qalǵan.
