Atyraýda jabylýǵa tıis ulttyq qyzdar mektebi apellıatsııalyq sotta jeńildi

Atyraý oblystyq sotynyń azamattyq ister jónindegi sot alqasy ulttyq qyzdar mektebiniń bilim berý qyzmetin toqtatý týraly birinshi satydaǵy sot sheshimin ózgerissiz qaldyrdy, dep habarlaıdy Kazinform agenttigi. 

Oblystyq sottyń baspasóz qyzmetinen málim etkendeı, azamattyq ister jónindegi sot alqasynda «Qazaq ulttyq qyzdar mektebi» JShS apellıatsııalyq shaǵymy qaralǵan.

Seriktestik shaǵymynda sot materıaldyq quqyq normalary durys qoldanbaǵanyn kórsetip, birinshi satydaǵy sot sheshiminiń kúshin joıýdy suraǵan.

– «Qazaq ulttyq qyzdar mektebi» JShS mektepke deıingi synyptarǵa arnalǵan uıym retinde tirkelgen. Alaıda, 2022 jyldyń 1 qyrkúıeginen bastap JShS tıisti lıtsenzııasyz mektep jasyndaǵy oqýshylarǵa bilim berý qyzmetimen aınalysqan. Osylaısha, «Qazaq ulttyq qyzdar mektebi» JShS tarapynan Qazaqstan Respýblıkasynyń bilim berý salasyndaǵy qoldanystaǵy zańnamasyn buzýǵa, atap aıtqanda lıtsenzııa bolmaǵan kezde qyzmetti júzege asyrýǵa jol berildi. Osyǵan baılanysty Atyraý oblysynyń bilim salasyndaǵy sapany qamtamasyz etý departamenti «Qazaq ulttyq qyzdar mektebi» JShS-niń bilim berý qyzmetin toqtatý týraly sotqa júgindi. Atyraý oblysynyń mamandandyrylǵan aýdanaralyq ekonomıkalyq sotynyń sheshimimen talap qoıý qanaǵattandyrylyp, «Qazaq ulttyq qyzdar mektebi» JShS-niń bilim berý qyzmeti toqtatyldy, - dep habarlady oblystyq sottyń baspasóz qyzmeti.

Birinshi satydaǵy sottyń sheshimimen kelispegen seriktestik basshylary apellıatsııalyq shaǵym túsirgen.

– Іs apellıatsııada jaýapker JShS-niń apellıatsııalyq shaǵymy boıynsha qaraldy. Ol sotpen materıaldyq quqyq normalary durys qoldanylmaǵanyn kórsetip, birinshi saty soty sheshiminiń kúshin joıýdy surady. Azamattyq ister jónindegi sot alqasy sot sheshiminiń zańdylyǵy men negizdiligin tolyq kólemde tekserdi. Atalǵan isti qaraý barysynda birinshi satydaǵy sotpen materıaldyq quqyq normalarynyń buzylýyna jol berilmegen. Birinshi satydaǵy sot is boıynsha durys, zańdy jáne negizdi sheshim qabyldaǵan degen qorytyndyǵa keldi. Sot sheshiminiń kúshin joıýǵa negizder anyqtalmady. Atyraý oblystyq sotynyń azamattyq ister jónindegi sot alqasynyń qaýlysymen birinshi satydaǵy sottyń sheshimi ózgerissiz, jaýapkerdiń apellıatsııalyq shaǵymy qanaǵattandyrýsyz qaldyryldy, - dep málim etti sottyń baspasóz qyzmeti.

Eske sala ketelik, budan buryn Atyraýda ulttyq qyzdar mektebi sot sheshimimen jabylǵanyn jazǵan edik.