Atyraýda zardap shekken úleskerdiń paıdasyna jer telimderi qaıtarylady

ATYRAÝ. KAZINFORM — Atyraýda turǵyn úı-qurylys koopertıvteri quryltaıshylarynyń zańsyz áreketinen zardap shekken úleskerlerge jer telimderi qaıtarylady. Qazir osyǵan baılanysty azamattyq ister qaralyp jatyr.

Atyraý qalalyq prokýratýrasynyń aqparatyna súıensek, «Atameken turǵyn úı», «Family town», «Baisanat Residence» jáne «Saraishyq Invest Group» turǵyn úı-qurylys koopertıvteri quryltaıshylary qylmystyq jaýapqa tartylyp, 6 jyldan 8 jylǵa deıingi merzimge bas bostandyǵynan aırylǵan.

— Qalalyq prokýratýranyń bastamasymen paıshylarǵa quqyqtyq kómek kórsetý, turǵyn úılerdiń qurylysyn aıaqtaý maqsatynda Atyraý qalalyq ákimdigi men oblystyq memlekettik sáýlet-qurylys baqylaýy basqarmasynyń mamandarynan jumys toby quryldy. Toptyń negizgi mindeti — paıshylarǵa turǵyn úı-qurylys koopertıvteri quryltaıshylary zańsyz ıemdengen múlikti qaıtarýdy qamtamasyz etý. Atalǵan jumys aıasynda prokýratýra «Baisanat Residence» TQK quryltaıshylarynyń biriniń jaqyn týystaryna zańsyz rásimdelgen 1 gektar jer ýchaskesin óz erkimen qaıtarýyna qol jetkizdi, — dep habarlady oblystyq prokýratýradan.

Qazir sotta qalǵan jer ýchaskelerin úleskerlerdiń paıdasyna qaıtarýǵa qatysty azamattyq isterdiń qaralyp jatyr. Atalǵan másele túpkilikti sheshimin tapqanǵa deıin qalalyq prokýratýranyń baqylaýynda bolady.

Eske sala ketelik, buǵan deıin Atyraý prokýratýrasy qaıyrymdylyq mekemesiniń jasóspirimderge dinı arazdyqty nasıhattaǵanyn anyqtaǵan edi.