Atyraýda zańsyz oıyn bıznesin uıymdastyrǵan áıeldiń bas bostandyǵy shekteldi

Atyraý oblysynda turatyn áıel 4 jyl buryn jeke kásipker retinde tirkelgen. Alaıda jyl basynda ıeligindegi ǵımaratta zańsyz oıyn bıznesin uıymdastyrǵany áshkerelengen. Sot úkimimen onyń bas bostandyǵy shekteldi, dep habarlaıdy Kazinform. 

Qarjylyq monıtorıng agenttigi Atyraý oblystyq tergep-tekserý departamentiniń shtab bastyǵy Bekbolat Ánesovtiń aıtýynsha, azamatsha H.-nyń 2019 jyly H.Qurmanǵazy aýdanynda jeke kásipker retinde tirkelgeni anyqtalǵan.

«Biraq paıdakúnemdik maqsatynda ıeligindegi ǵımarat ishinde zańsyz oıyn bıznesin uıymdastyryp, býkmekerlik keńseni ashqan. Zańsyz áreketin iske asyrý úshin teledıdarlar ornatyp, kompıýterlik qurylǵylarǵa ınternet jelisi boıynsha «MOHIO KENO BET» qumar oıynyn translıatsııalaıtyn «Chashier MOHIO» baǵdarlamalyq ónimin jabdyqtap, saıtqa júktegeni anyqtaldy. Agenttiktiń jergilikti departament qyzmetkerleri 2023 jyly 6 qańtarda jedel-izdestirý is-sharasyn júrgizip, quqyq buzýshynyń zańǵa qaıshy áreketin áshkereledi», - dep habarlady Bekbolat Ánesov.

Onyń aıtýyna qaraǵanda, quqyq buzýshyǵa qatysty QR Qylmystyq kodeksiniń 307-babynyń 1-bóligimen (Oıyn mekemesin zańsyz ashý ne ustaý nemese oıyn bıznesi salasyndaǵy qyzmetti zańsyz uıymdastyrý, sol sııaqty zańsyz oıyn bıznesi úshin úı-jaılar berý ne Qazaqstan Respýblıkasynyń oıyn bıznesi týraly zańnamasynda belgilengen oryndardan tys qumar oıyndaryn uıymdastyrý jáne ótkizý ne oıyn bıznesi salasyndaǵy qyzmeti lıtsenzııasyz júzege asyrý) qylmystyq is tirkelip, tergeý júrgizilgen. Keıin qylmystyq is sotqa joldandy.

Qurmanǵazy aýdandyq sotynyń úkimimen H. atalǵan bappen kináli dep tanyldy. Oǵan 1 jyl merzimge bas bostandyǵyn shekteý jazasy taǵaıyndaldy.

Eske sala ketelik, budan buryn Qarjylyq monıtorıng agenttigi Telegram-da jańa botty iske qosqanyn jazǵan bolatynbyz.